"Hamaika ikusteko jaioak gara" atsotitza ez zegoen XI. Esaera Zaharren txapelketako zerrendan, baina present egon zen lehiaketan egun osoan. Hamaikagarren edizioa izateaz aparte, aurten ia talde guztiek nabarmendu zuten lehenengo kanporaketan bertsoak "oso zailak" izan zirela, "Erandio, Leioa eta Loiu, arto asko erein eta gutxi koiu" bezalako klasikoak ez asmatu izana adibidetzat jarriz.
Beste batzuek aldiz, segurtasun arazoak ikusi zituzten lehenengo kanporaketan erabilitako prozeduran: "Bertso berberak erabili dira lau ibilbideetarako eta sakelako telefonoz posible litzateke horien berri ematea". Horrelakorik ez da aurten gertatu, baina antolakuntzak horren berri hartzea ona litzateke.
Ander Deuna ikastolan izan zen herri bazkariaren ostean, Laura Mintegi idazleari egokitu zitzaion epaile lanak egitea, Sustrai Colina eta Ainhoa Agirrezabalbeitia esaera zaharrak bertso bihurtzeko beharra bete behar zutela. Hasteko, bostgarren eta seigarren postuetarako proba egin zen, pasa den urteko irabazleak (Badok Hamairu) erraz nagusitu zirela. Final erdian, Uribe Kostako bi taldeak lehia galdu eta ondoren hirugarren eta laugarren postuengatik borrokatzea baino ez zitzaien gelditu.
Finala aldiz, bihotzekoa eragiten dutenekoa izan zen, berdinketaz berdinketa igaro baitzen, baina azkenean Zorrotzako Kar Kar Kar taldea nagusitu zen, Uribe Kosta, Ezkerraldea eta Bilboko partaideak zituen Hau Pittu Hau Bilboko konpartsako taldearen aurretik.
Bukatzeko, AEKko kideek gogoratu zuten datorren urtean hitzordu bera izateaz aparte, datorren domeka euskaltzaleek bi hitzordu dituztela: Lutxanan Berbotsek antolatzen duen Kanpomartxo eta Lesakan EHEk deitutako Hizkuntz Eskubideen Eguna.
Bilbotik etorritako taldeak nagusitu ziren Sopelako Nikola AEK euskaltegiak antolatutako XI. Esaera Zaharren txapelketan: Kar Kar Kar izeneko Zorrotzako taldeak irabazi zuen lehia, ondoren Hau Pittu Hau Bilboko konpartsa bigarren sailkatu zen. Horien ostean gelditu ziren sopeloztarrak (Tai Txi) eta Algortarrak (Anboto). Pasa den urteko irabazleek (Badok Hamairu) bostgarren postua erdietsi zuten. Seigarrenak ere Bilbotik etorri ziren (Zorrotza).
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun