Mozioa bere osotasunean irakurtzeaz gain hurrengo balorazioa eta eskakizunak egin ditugu han bertan.
Getxo Biziak mozio bat aurkeztu du
Getxo Bizia herri plataformak mozio bat aurkeztu du udalbatzar honetan irakurria, eztabaidatua eta bozkatua izan zedin, baina testua gaiordenetik baztertu egin duzue. Non daude duela hilabete askotako hitzak eta promesak? Non formula eta bideak lege faxistek galerazitako hautetsiek udal batzordeetan eta udal batzarretako eztabaidetan parte har dezaten? Hauteskundeetan herritarrek adierazitakoari beste behin egin diozue trufa.
Oraingoan gainera aipatu ere ez duzue egin mozioan salatu dugun injustizia. Hobe da antza Getxoko gazte hauek jasan zituzten torturak eta jasaten ari diren ezelako bermerik gabeko prozesu judizialari buruz hitzik ere ez egitea.
Getxo Biziaren eskaera sinplea bezain zentzuduna da: Arkaitz, Kepa eta Endika, Getxoko hiru herritar pairatzen ari diren indefentsio egoera ezagutzeko, Udalaren ordezkariek hitz egin dezatela auziperatuen abokatuekin. Eta honekin batera jarrera argia eta sendoa torturaren aurrean, torturarik ez egoteko neurri eraginkorrak aldarrikatu eta bermerik gabe egindako adierazpenak jendea gartzelaratzeko erabiliak izan ez daitezen exijitzea.
LPZ-RPT, Lan Postuen Zerrenda
Aurreko udalbatzarrean Lan Postuen Zerrenda proposamena gaiordenetik erori eta gero, kritikatu egin genuen jada azken urte hauetako udal honetako pertsonal politika.
Duela hilabete esan genuen eta gaur ere errepikatzen dugu, Udal batzarrean onartu zen azken Lan Postuen Zerrenda, 2.000. urteko LPZ, bertan behera utzi dutela epaitegiek eta horregatik ekarri egin dela udalbatzarrera azken LPZ hau. Gezurra dirudi azken 4 urte luze hauetan alde sindikalarekin ezelako akordiorik ezin lortu izatea LPZ berri baten inguruan.
Gaurko bozketan gainera, Getxo Biziari dagokion zinegotzi postua baliatu du beste behin ere udal gobernuak bere proposamena aurrera ateratzeko! 13 alde, 12 kontra. Honelako bozketetan isladatzen da argi eta garbi udal gobernuaren gezurrezko gehiengoa.
Edukin zehatzei dagokienez aipamen xume batzuk.
Udaltzainen postuetan hainbat irregulartasunez osatuta dago zerrenda. gehiegizko soldata osagarriak postu batzuetan, lehiaketa eskatzen duten postu batzuk izendapen librekoak bezala ageri dira, postu zehatz baterako titulazio nahikoa ez duen pertsona bat postu horretan kokatzen da. Zuzenduko al dira irregulartasun hauek?
Hizkuntza Politikarako Sailburuordetzaren txostena dela eta, zuzendu al dira bertan agindutakoak? Ezarri al zaie 4. hizkuntza eskakizuna Sistemetako eta Datu-Baseetako Arduradun eta Sareetako eta Segurtasuneko Teknikari postuei? Udaltzaingoko lehen agente 13 postuei 3. hizkuntza eskakizuna ezarri al zaie? Bigarren plangintzalditik hirugarren plangintzaldira aldatu nahi ziren 5 derrigortasun datak, lehengoan utzi al dira? Zergatik daude oraindik jendaurreko lanpostuak derrigortasun datarik gabe?
Galdera guzti hauek erantzun bat merezi dute.
Getxo Bizia
e-posta: info@getxobizia.org
Ohi bezala Getxo Biziako hautetsia eta ordezkariak gaurko udalbatzarrean egon gara. Izandakoen inguruan, ezin aipatu gabe utzi udal agintariei lan, ordainsari eta gizarte baldintzen inguruko negoziazioa eskatuz ELA eta LAB-eko ordezkarien hileroko protesta, gaur ere bertan izan dena, udal eta foru administrazioen kudeatzaileen itxikeriaren lekuko. Bestetik Getxo Biziak iritzia eman du, 13-12 bozketarekin Getxo Biziari dagokion zinegotzi postua aintzat hartu gabe, onartu den Lan Postuen Zerrendari buruz. Halaber Arkaitz Goikoetxea, Kepa Saratxaga eta Endika Lejarzegi pairatzen ari diren epaiketak eta indefentsioa salatuz, galde-eskeen txandan mozioa irakurri dugu.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun