Lamiakoko dantza taldearekin batera jaio zen 1978an maskarada. Ordutik hona, Euskal Herriko mitologiaren antzezpena egiten dute, urtetik urtera, maiatzaren azken ostiralean. Alde batetik, jentil mitologiaren eta inposatutako kristautasunaren arteko borroka uztartzen dute. Eta bestetik, auzoari berari izena ematen dion Lamiaren istorioa.
Izan ere, hiru atal ditu ikuskizunak. Lehenengo biak arratsaldean egiten dira, 17:30etik aurrera. Gaztelubide kaletik abiatuta, herrian zehar egiten den kalejiran, beste pertsonaia batzuk bilduko dituzte, dantzen bitartez, Marik eta Sugarrek. Hirugarren zatian, berriz, suaren inguruan dantzatuko dute herrian bildutako pertsonaia guztiek, 22:30ean Lamiakoko Kultur Aretoaren aurrean egingo den gaueko akelarre handian.
Horretaz gain, dantza taldearen 25. urteurrena ospatzeko, diapositiba emanaldia antolatu dute, bihar bertan, gaueko hamarretatik aurrera.
Lamiaren kondaira
Prudentzia alargunaren semea marinela zen. Urrunean itsasontziren bat ikusten zuenean, semea etorriko zen esperantzaz Ondizen zuen etxetik Abra ingurura jaisten zen. Halako batean, betiko legez, semea agertu ez eta tristuraz beteta etxerako bidean hil egin zen. Kondairak dioenez, Lamia bihurtu zen.
Urtero bezala, Lamiakoko kaleak hartuko dituzte, maiatzaren azken ostiralean, Marik, Akerrek, Ingumak eta beste hainbat pertsoi mitologikok. Gainera, aurten, maskaradaren 25. urteurrena ospatzen da. 17:30etik aurrera eta gaua bitartean, magiaz beteko dituzte Leioako auzo horretako txoko guztiak.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun