Aralarrek adierazi duenez, Artea merkatalgunerako sarbidea izateko asmoz eraiki zen 1997an, Berangoko errotondarainoko Uribe Kostako korridoreko zatia, "Eskumaldeko hirigintza-kolonizazioa erraztuz". Hori dela eta, "hondamenditzat" jo dute horrek izandako eragina. Batetik, inmigrazioaren ondorioz, biztanle hazkunde izugarria jasan dutelako hondartzak dituzten herriek. Eta bestetik, etxebizitzen salneurria "kontrolik gabe" egin duelako gora. Euren hitzetan, "umilagoak diren sendien seme-alabek herritik kanpora jo behar izan dute etxea topatzeko".
Leioa adibide bezala jarriz, "herritarrengan sustraiak galdu izanaren sentimendua gero eta handiagoa" dela diote Aralarreko ordezkariek, "herrien nortasuna kolokan egoterainokoa". Horretaz gain, horrelako korridoreek baserri guneen artean sortzen dituzten zatiketak, "naturaren garapenerako kaltegarriak" direla diote. "Gure ustez hondartzetara joan ahal izatea errazteko baino ez den izango korridorea saldu nahi digute orain. Trafikoa eta ingurumenerako kalte handiagoa baino ez ditu ekarriko", adierazten dute.
Uribe Kostako korridorea eraikitzeak kalteak baino ez dituela ekarri salatu dute Aralar alderdiko eskualdeko ordezkariek. Atzo kaleratutako prentsa oharraren bidez adierazten dutenez, errepidea zabaltzeko lanak egiteko orduan, gehienez karril berri bat baino ez litzateke jarri beharko. Halaber, Sopelara arte zati berria eraikitzeak, "lurren gaineko espekulazioa ahalbidetzeko aukera berria" suposatuko lukeela ohartazi nahi izan du Aralarrek.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun