Marisa Arruek agerian utzi duenez, Batasuna udaletxean ez dagoela agintaldiko lehenengo urtea bete delako, "euren buruak zoriontzeko" eman du gaurko prentsaurrekoa Getxoko PPk. "Askatasun apur bat gehiago egoteaz gain, ETAko hiltzaileek jada getxoztarren diruarekin ez direla finantziatzen harrotasunez hartu behar dugu", adierazi du, Zarraoa "demokraten garaipenarekin" ez duela bat egin nahi gaineratzearekin batera.
Horretaz gain, "mundu erradikalarekin" Zarraoak duen "elkarkeria" kritikatu du Getxoko PPko bozeramaleak eta "biltimen eta demokratengandik aldendu" izana egotzi dio alkateari. "Berak eta EAJk erradikalei ordaintzen dieten bidesaria ezagutzeko esandakoak entzutea besterik ez dago", gaineratu du.
ETAko Bizkaia komandoari laguntzea leporatuta kondenatua izan zen Patxo Zabalari buruz hitzegiterako orduan, berriz, "tiro frogak egiten", Barrikako baserrian "ETAko kide garrantzitsuak izan zituenaren "susmoa" duela aipatu du Arruek. Atezain lanetan, bisitak euren bulegoetara laguntzen zituela ere gaineratu du. PPko zinegotziak esan duenez, "harreman zuzena zeukan gurekin. Sartzeko eta irteteko ordutegiez gain, une horietan babesturik geunden ala ez ere bazekien".
ETAri laguntzea leporatuta kondenatua izan zen laguna kontratatu izanari eusteko, Inaki Zarraoa alkateak egindako adierazpenak "doilortzat" jo ditu Marisa Arrue Getxoko PPko bozeramaleak. Ildo horretan, udal lan zerrendetatik lanpostuak emateko orduan, "kontu handiagoarekin ibiltzeko" eskatu dio zinegotzi popularrak. Gaineratu duenez, "Ez gara diskriminazioaz hitzegiten ari, segurtasunak baizik. Nori ematen dion lanpostua jakin beharko luke Udalak". Are gehiago, "oraindik ere lanpostu askotan mundu erradikalarekin lotutako jendea" dagoela esatera heldu da. Arrueren ustez, alkatearen hitzek "Zuzenbide Estatua manipulatu eta errealitatea faltsutu egiten dute, politikoki eta pertsonalki etekinak lortzea helburu bakarra izanik". Nahiz eta langilearen egoera zein zen ezagutu, berdin jokatuko zuela adierazi zuen Zarraoak, "lanpostu hori eskuratzeko eskubide osoa zeukalako".
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun