Kontzertu nagusiei dagokienez, Ibon Koteron izango da Getxo Folk jardunaldiei hasiera emateko arduraduna, irailaren 1ean. Albokaren maisua izan da euskal musika tresna honen berreskurapenaren protagonista nagusia. Gaur egun, Kepa Junkera bezalako artista ezagunekin egiten dituen kolaborazioekin tartekatzen ditu bere lanak eta emanaldiak. Oraingoan, "Airea" bere lan berriko kantuak aurkeztuko ditu. Horretan, Europako eta Afrikako soinuak eta erritmoak bildu ditu Koteronek.
Irailaren 2an, bretainiar eta magrebtar doinuak uztartzen dituen Thalweg taldeari helduko zaio txanda. 2000an sortu zen eta hamar musikarik osatzen dute. Besteak beste, Emmanuel Le Houezec abeslaria eta Khliff Miziallaoua baxu jolea nabarmendu daitezke.
Touré Kunda talde senegaldarrak emango du kontzertua irailaren 3an. Touré anaiek osaturiko taldeak 1970eko hamarkadaren bukaeran ekin zion bere ibilbideari. Ordutik hona, bere herrialdeko soinu tradizionalak zabaldu ditu mundu osoan zehar. Senegaleko doinuetan oinarritu arren, gaur egungo musikarekin uztartzen dituzte horiek, musika tresna elektrikoak erabiltzen baitituzte.
Azkenik, La Volée D'Castors talde quebectarrak emango dio bukaera Getxo Folk jaialdiari, irailaren 4an. La Bottine Souriante taldearekin batera, Quebeceko musika taldeen artean ezagunena da La Volée D'Castors. Mugarik ezagutzen ez duen musika interpretatzen dute, soinu tradizionalak eta gaur egungo konponketak uztartuz.
Arratsaldeko eta gaueko kontzertuak
Beste alde batetik, ohikoa denez, nazioarte mailan oso ezagunak ez diren arren, kalitate handia duten taldeei egingo zaie lekua arratsaldeko kontzertuetan. Aurtengoan, Xuacu Amieva (Asturias), Kukuma (Euskal Herria), Kilema (Madagaskar) eta Sidi Samb (Senegal) taldeak arituko dira.
Gauetan ere, zer ikusi eta zer entzun egongo da Getxo Folk 2004 jaialdian. Arratsaldeko kontzertuetan bezala, Areetako Geltokiko Plaza ondoan egongo den beste karpatik igaroko dira Nubeira (Galizia), Belsech (Kanariar Uharteak), Taray (Murtzia) eta Zoobazar (Madril).
(Argazkian, Senegalgo Touré anaiak)Getxoko Nazioarteko Folk Jaialdiak osatu du bere XX. edizioko egitaraua eta, besteak beste, Ibon Koteron (Euskal Herria), Thalweg (Bretainia / Magreb), Touré Kunda (Senegal) eta La Volée D'Castors (Quebec) bezalako artista eta taldeak nabarmen daitezke. Hauei guztiei beste zortzi talde gehitu behar zaizkie, irailaren 1etk 4ra bitartean herria munduko musikez beteko dutenak. Kultur Etxeko iturriek gaur iragarri dutenez, ohikoa den bezala, jardunaldi bakoitza arratsaldeko kontzertuekin hasiko da, Areetako Geltokiko Plaza ondoan dagoen aparkalekuan, arratsaldeko 19:00etatik aurrera. Gainera, plaza horretako karpan izango dira kontzertu nagusiak, 21:30ean hasita. Hauek bukatzean, 23:15ak aldera, ondoko aparkalekuan izango da Munduko Terraza, gaueko kontzertuak hartuko dituena.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun