"Ertibil Bizkaia 04" erakusketak egungo artearen pluraltasunarekin eta aniztasunarekin topo egitea proposatzen dio ikusleari. "Munduko arazoekin, gizakien nortasunarekin edo gizarte errealitatearekin zerikusia duten gaiak eta bitartekoak artistaren adierazpenaren zerbitzura daude. Ideia, pentsamendu eta kontzeptu guztiak libre dira erabat", antolatzaileen hitzetan.
XXI. edizioa
Aspaldiko egitasmoa da gainera. Euskal arte garaikidearen agertokian nahiko egonkor iraun du, 1983. urtean lehen edizioa egin zenetik. Bertan ikusi ahal izan dira, euren hastapenetan, gaur egungo arte zirkuituetan arrakasta handia duten bizkaitar artistetatik asko.
Ekimen honetan, arte plastiko eta bisualak jorratzen dituzten gazteei laguntzea eta sustatzea da apustua, eta Bizkaiko Foru Aldundiko Kultura Sailaren jarduketa-eremuaren barruan sartzen da.
Guztira, Bizkaiko hamasei udalerritan egongo da "Ertibil Bizkaia 04", bakoitzean hamabost egunez geratuz. Erakusketa honen helburua da ahalik eta jende gehienak ikus ditzala artista gazteek eginiko margoak, eskultura, argazkiak eta, estreinako aldiz, bideoak.
Datorren uztailaren 16ra arte egongo da ikusgai, Gorlizko Erakusketa Aretoan, "Ertibil" Bizkaiko artista gazteen erakusketa ibiltariaren XXI. edizioa. Hilaren 6an zabaldu zen herrian eta bertan 20 artista baino gehiagoren lanak aurkezten dira. Pilar Mur, Begoña Zubero eta Leire Bergarak osatutako epaimahaiak hautatutakoak. Deialdian 60 sortzailek hartu zuten parte, 89 lanekin guztira. Izan ere, artista bakoitzak lan bat edo bi aurkeztu ditzake. Hain zuzen ere, Kepa Garraza gazte berangoztarra izan zen 3.600 euroko lehenengo sariaren irabazlea, “No-one gets out alive from here” izenburuko aluminio gaineko argazkiarekin. Honekin batera, Ibon Garagarza ("Nuevo Orden 2" marrazkia eta collagea) eta Aida Ulibarri ("Equilibrio Bipolar" eskultura) Getxo udalerriko bizilagunak eta Amara Brea ("El espacio compartido - Jersey I" argazkia) berangoztarra izan ziren aukeratuak erakusketan parte hartzeko.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun