Nahiz eta ekainaren 25eko udalbatzan PPk aurkeztutako mozioa onartua ez izan, popularrek eskatuta, jaien dekretuan aldaketak egitea erabaki zuen Getxoko Gobernu Batzordeak, "jai guneetan, txosnetan eta horien inguruan terrorismoaren apologia egitea debekatu dadin".
Esan beharra dago, udal arduradunek bere garaian azaldu zutenez, Algortako Portu Zaharreko jaietatik aurrera baino ez duela eragina aldaketak, aurrekoak hartzen dituen dekretua, San Inaziokoak barne, PPk eskaera egin aurretik idatzita zegoelako jada.
Badirudi PPk eskatutakoek azkenean eraginik izan dutela. Izan ere, Getxo Antimilitarista, Algortako Gazte Asanblada eta Segi taldeek izan behar zuten txosna jartzea debekatu du Iñaki Zarraoa Getxoko alkateak. Guzti hau salatzeko komunikatua kaleratu du Algortako Portu Zaharreko Jai Batzordeak.
Algortako Portu Zaharreko Jai Batzordearen adierazpena
"Portu Zaharreko Jai Batzordearen ustez festen antolaketan parte hartzen duen talde orok du txosna jartzeko legitimitatea, parte hartze hori baita txosna izateko betebeharreko baldintzarik funtsezkoena, eta ez udalak bere nahietara ematen dituen baimenak.
Hori dela eta, guztiok berdinak garela uste dugu, udalak "legalak" eta "ilegalak" bezala sailkatzen gaituen arren. Hortaz, kolektibo bakoitzak bere txosna izateko eskubide osoa duela uste dugu. Horrela izango ez balitz, udalari arrazoi ematen arituko ginateke gure abiaburuak bazterrean utziz.
Jai Batzordea festen dinamizatzailetzat ez dute hartzen udal arduradunek eta, jarrera horrekin, Getxo udalerriko giza-taldeei oztopoak jartzen ari dizkiote Portu Zaharreko jaietan parte hartzeko.
Jai Batzordeko hainbat talderen defentsa-gabezi egoera aintzat hartuta, Getxoko Udalaren jokabideak Portu Zaharreko jaiak merezi duten pluraltasun printzipioa eta herritarren parte-hartzea ez dituela errespetatzen uste dugu.
Jai herrikoien alde"
Algortako Portu Zaharreko Jai Batzordea
Portu Zaharreko jaietan txosna bat jartzea debekatu du Zarraoak talde horiek "ilegalak" direlakoan
Gaur arratsaldean abiatuko dira Algortako Portu Zaharreko jaiak eta, antza, ez dira ongi hasiko. Izan ere, txosna bat (Getxo Antimilitarista, Algortako Gazte Asanblada eta Segi taldeek konpartitzen dutena) jartzea debekatu du Getxoko Udalak, bere iritziz, "talde horiek ez direlako legalak, eta, hortaz, txosna jartzeko eskubiderik ez dutelako". Jai Batzordeak udalaren erabakia salatu eta "festen antolaketan parte hartzen duen talde orok txosna jartzeko legitimitatea" duela adierazi du, "parte hartze hori baita txosna izateko bete beharreko baldintzarik funtsezkoena".
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun