Antzezkizunak hiru atal izango ditu. Lehenengoa, "Zirga itsasadarrean" izenburua daukana, 19:30ean hasiko da Txurruka kaian eta bertan honako gai hauek ikusi ahal izango dira: zirgarien kontratua, itsasuntziaren zirga, ibiltarien lehorreratzea, ongi etorria eta 1879ko martxoaren 14ean izan zen Mari zirgariaren erorketa historikoa (istripu hori garaiko egunkarietan agertu zen).
Lehen atal hau bukatutakoan, parte hartzaileek kalejira egingo dute Bizkaiko Zubian hasita, Kale Nagusitik Xake plazaraino. Bertan "Mina" eta "Kapatazaren eskaria" koreografiak antzeztuko dituzte.
Leku berean, beste bi koreografia ikusi ahal izango dira 20:30etik aurrera. "Laguntasuna" (Marirekin elkartasuna beste zirgarien eskutik) eta "Mariren tristura". Ekitaldia kapatazarekin akordio bat adosten dutenean amaituko da. Gidoia Arantza Iurre Getxoko Antzerkiko Eskolako zuzendariak egin du.
Garaiko balio handiko jantziak
XVIII eta XIX mendeetako jantziak egiteko burututako ahalegin handia azpimarratu nahi izan dute antolatzaileek. Hauek egiteko, Bilboko Museo Etnografikoan gaur egun ikus daitekeen Baionako paperezko jantzien erakusketa hartu dute oinarri. Antzezkizunean gizonezko sei jantzi eta emakumezkoen beste horrenbeste agertuko dira. Horiek guztiak balio handikoak dira joskintzari eta jantzigintzari dagokionez.
Beste berritasun bat aurten Erromoko Otxoteak egindako eta kantatuko duen abestia izango da. "Zortziko" estilokoa da eta horrekin Berantzagi taldeko kideek dantza egingo dute. Ondarreta Abesbatzak ere abesti berri bat prestatu du ikuskizunerako.
XIX. mendean zirgekin (sokekin) eta bi idiren laguntzarekin Abratik Bilboko Portura sartzen ziren itsasuntziak atoian eramaten zituzten emakumeen historia gogora ekarriko dute berriro, irailaren 18an, Getxo udalerriko sei kultur elkartetako 150 lagunek baino gehiagok. Antzezkizuna Areetako hainbat tokitan egingo da (Txurrukako kaia, Bizkaiko Zubia, Kale Nagusia eta Xake Plaza), 19:30etik aurrera. Besteak beste, Ondarreta abesbatza, Erromoko Otxotea, Jentilak elkartea, Berantzagi eta Zazi Eskola dantza taldeak eta Getxoko Antzerki Eskola izango dira partaide. Horretaz gain, nahi duen orok parte hartu dezakeela adierazi dute antolatzaileek. Entseiuak astelehenetik ostegunera egiten dituzte, 20:00etatik aurrera, Areetako Kultur Etxean.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun