Getxoko PPk kontrakoa esan arren, alderdientzako tokia badauka udal webguneak

Herritarrekin harreman zuzenagoa izateko, www.getxo.net web orrialdean alderdi politikoek gune berezi bat eduki dezaten eskatuz, Getxoko PPk egindako adierazpenak "zur eta lur" utzi ditu udal arduradunak. Getxoko Udaleko iturriek jakinarazi dutenez, horrelakorik badago aspalditik webgunean. Gainera, gune horretatik, mezuak bidali ahal zaizkie internet bidez "udalbatzan ordezkaritza daukaten alderdi guztiei" eta horien web orrialde ofizialetan sartzeko lotura ere badago. Hain zuzen ere, bi aukera hauek eskatu zituzten espreski popularrek. Getxoko PPk Sopelako udal webgunea jarri zuen adibidetzat. Hala ere, eurek eskatu bezala, honek ez dauka alderdi politikoen web orrialde ofizialekin lotura zuzenik; Getxokoak, ordea, badauka. Haatik, talde bakoitzaren aurkezpena irakurri eta zinegotzi bakoitzarekin harremanetan jartzeko aukera dago Sopelakoan. Getxokoak udalbatzen soinu artxiboak ere eskaintzen ditu.