Uribe Kostako zortzi eskolen kalitatea saritu du Eusko Jaurlaritzak

Erabiltzailearen aurpegia
Ikastetxeetako kudeaketaren kalitatea hobetzeko asmoz, Eusko Jaurlaritzako Hezkuntza Sailak abian jarritako proiektu pilotu batean aritu dira lanean, azken bi urteetan, Arabako, Bizkaiko eta Gipuzkoako 24 eskola. Parte hartu duten ikastetxeetatik 17k eskuratu dute kalitatearen ziurtagiria, lortu dituzten hobekuntzengatik. Hain zuzen ere, Uribe Kosta eskualdekoak dira, Lehen Hezkuntzari dagokionez, ziurtagiria lortu duten guztiak: Santo Domingo (Berango), Gorliz, Andra Mari eta Gobela (Getxo), Txomin Aresti (Leioa), Plentzia, Elortza (Urduliz) eta Zipiriñe (Sopela), hurrenez hurren. Bigarren hezkuntzan, berriz, hauek lortu dute ziurtagiria: Aniturri (Agurain), Elorrio, Txurdinaga Behekoa (Bilbo), Txindoki-Alkartasuna (Beasain), Olazabal (Legazpi), Mutriku, Zuazola (Oñati), Lizardi (Zarautz) eta Zumaia. Aurreikusitakoaren arabera, beste 30 ikastetxek parte hartuko dute ekimen honetan datorren ikasturtean.
Galdakaoko Eguzkibegi ikastolan atzo egindako ikasturte berriaren inaugurazioan eman zuen aipatu proiektu pilotuaren berri Anjeles Iztueta Hezkuntza sailburuak. Gara egunkariak jasotako adierazpenetan, "kalitatearen ziurtagiri hauek euskal hezkuntza sistema Europako lehen tokian dagoela" erakusten dutela aipatu zuen Iztuetak. Hala eta guztiz ere, oraindik hobetzeko asko dagoela nabarmendu zuen sailburuak. Horiek hala, bai administrazioa, bai hezkuntza arloa kudeatzeko sistema propioaren aldeko apustua egin beharra dagoela esan zuen Iztuetak.

Kalitatezko Kudeaketarako Sistema

Kalitatezko Kudeaketarako Sistema deritzo 24 eskoletan martxan jarri den proiektu pilotuari, eta irakasteko eta ikasteko prozesuak estandarizatzea du helburu nagusi. Horretarako, hainbat irizpide komun finkatu dira, ikasleen ebaluazioan eta ikasgaien programazioan, kasu. Anjeles Iztuetak agertu zuenez, proiektu pilotu hau martxan jarri ahal izateko, beharrezkoa izan da ikastetxe bakoitzaren egoera aztertzea lehendabizi. Hortik abiatuta, irizpide komunak martxan jartzeko beharra ikusi da irakasteko eta ikasteko prozesuan.

Garai latzak dira. Ia egun batetik bestera gure bizimoduak hankaz gora jarri ditu birus batek, eta kolokan daude gauza asko. Hedabideontzat ere ez dira garai gozoak, noiz eta gure lanaren beharra inoiz baino agerikoagoa denean. Horregatik, zure laguntza materiala ere behar dugu aurrera jarraitzeko.

Honenbestez, HIRUKAlagun egitera animatzen zaitugu, urtean 35 euroko ekarpena eginda, edo gure 5. urteurrena dela eta martxan ipini dugun Eman Bostekoa HIRUKAri kanpainan parte hartzera (bost euroko ekarpena eskatuko dizugu). Horretarako, jarri gugaz harremanetan administrazioa@hiruka.eus helbidera mezu bat idatziz.


Izan zaitez HIRUKAlagun