Irailaren 22an, hain zuzen ere, Europako Autorik Gabeko Egunean, Obieta, Jado eta Geltoki kaleetan (Truebara arteko zatia) zirkulazioa moztuko dute Erandion, 10:00ak eta 20:00ak bitartean. "Autoentzako ibilbide alternatiboak jartzeaz gain, zamalana baimenduta egongo da eta auzotarrei behar bezala ohartaraziko zaie", azaldu du Trabuduak. Gainera, pozik ageru zen bera, Erandio horrelako ekimenean parte hartzen duen lehenengo aldia delako. Astrabuduan, aldiz, ez da oinezkoen gunerik jarriko, "bertan egiten ari diren obrek eragin dituzten kale mozketek ezinezkoa egiten dutelako".
Hausnarketa-jardunaldia
Politikariak, teknikariak eta udalerriko elkarteetako kideak parte hartu zuten hausnarketa-jardunaldiarekin eman zitzaion atzo hasiera, Erandion, Mugikortasun Iraunkorraren Asteari. Gaur Akarlandan jarraipena izan duen mahainguruak "Iraunkortasun Plana gauzatzeko lehenengo urratsak eman eta ondorioak ateratzea" du helburu, Trabuduak nabarmendu duenez. Izan ere, inplikaturiko sektore guztien artean adostutako idatzia lortu nahi dute. Besteak beste, egoeraren analisia eta egon daitezkeen irtenbideak bildu nahi dituzte, trafikoari, hirigintzari, gizarte arazoei eta enpleguari dagokionez.
IHOBE Ingurumen Jarduketarako Sozietate Publikoaren bitartez, Eusko Jaurlaritzako Lurralde Antolamendu eta Ingurumen Sailak koordinatutako Europako Mugirkotasun Iraunkorraren Asteari hasiera eman zitzaion atzo. Bizkaia, Gipuzkoa eta Arabako foru aldundiek eta Bizkaiko Garraio Partzuergoak ere kanpainan laguntzen ari dira. Uribe Kosta eskualdean, berriz, hainbat dira ekimenarekin bat egin duten udalerriak. Sopelan eta Getxon ez ezik, Berangon eta Erandion ere ekitaldi ugari antolatu dituzte asteburuan, Autorik Gabeko Egunaren inguruan. Berangon, bizikleta ibilaldia egingo dute bihar, 16:30etik aurrera, Berangoko Txirrindulari Elkartearen eskutik. Udal arduradunek gazteei dei egiten diete, batez ere Gaxt Klubeko bazkideei, Moreaga parketik abiatuko den ibilbidean parte har dezaten. Erandion ere bizikletada antolatu dute larunbat honetarako. Besteak beste, Altzagatik abiatuko dira, 19:00etan, "bizikletaren erabilera bultzatu eta garrai alternatiboen herritarrak kontzientziatzeko", Izaskun Trabudua ekimenaren arduradunek adierazi duenez. Gainera, gainontzeko egunetan, hitzaldiak, kale-tailerrak, puzgarriak, bide-heziketa eskolak eta irristaketa egongo dira.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun