Arrietara inguruetara kotxeak sartzeko debekua mantenduko dute
2004ko ira. 20a, 23:26
Behin udaldia amaituta, Larrabasterrako Arrietara hondartzarako bidea ibilgailuentzat itxita mantentzea erabaki du Sopelako Udalak. Ricardo Ibarra Informazio, Komunikazio eta Turismo zinegotziak "El Correo" egunkariari adierazitakoaren arabera, neurri hori ezartzeak hasieran protestak eragin arren, "beharrezkoa da gunea oinezkoentzat egitea, emaitza onak eman dituelako". Hala ere, areatzatik 100 metrora dagoen langa kendu eta "oraindik erabaki gabe" dagoen beste sistema bat jarriko dute, besteak beste, auzotarrenak edota bestelako baimendutako ibilgailuak sar daitezela errazteko. Eta kostaldean dauden ostalaritza lokaletako zamalanetarako ordutegiak egongo dira. Horiek guztiak adosteko, bilera egingo dute, aste honetan, bertako bizilagun eta kaltetuekin. Barinatxeko aparkalekuari dagokionez, ordaintzeko modua aldatuko dute. Uda honetako 5 euroko kuota finkoa kendu eta aparkatutako denboraren arabera ordaindu ahal izango du kotxeetako jabeek. Baliteke makina bereziak jartzea horretarako.
Arrietararako bidea ibilgailuentzat itxita mantentzeko erabakiarekin, "Bizkaiko Fori Aldundiko Ingurumen Sailak ematen dituen ildoen arabera" arautu nahi dute eremua, Ibarrak adierazi duenez. Zinegotziaren hitzetan, "babesturiko gunea sortu nahi dugu hondartza ingurua oinezkoentzak eginez". Hala ere, TAO sistema jarriko denik ukatu du.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun