Arantza Yurre bozeramaleak azaldu duenez, aurten parte hartu behar zuten taldeetako batzuk antzerkia egiteari utzi beharko diote, "horien irakasleen soldatak Emakumeen Bideak zirkuitoko irabazietatik ateratzen zelako".
Bizkaiko Foru Aldundiak, berriz, "dirulaguntzak emateko orduan lehentasun aldaketa" egon dela adierazi du. Baita horren berri eman zitzaiela urtarrila eta otsaila artean egindako hiru bileratan. Hori dela eta, Getxoko Antzerki Eskolak agertutako haserrea deitoratu dute foru erakundetik. Euren hitzetan, "seguru gaude eurek daukaten esperientziarekin egoera bideratzen jakingo dutela". Beste alde batetik, dirulaguntzei dagokienez, "beste gainontzeko elkarteekin dagoen tratu berbera" eman zaiela gaineratu dute.
Bederatzi udalerrik laguntzen duten Emakumeen Bideak antzerki zirkuitoa bertan behera uztea erabaki du, sei urtetik hona, aipatu jarduera koordinatzeaz arduratu Getxoko Antzerki Eskolak. Izan ere, "azken lau urtetan eman duen 8.000 euroko dirulaguntza, 1.000 eurotan utzi du" Bizkaiko Foru Aldundiko Aukera Berdintasun eta Genero Politika Sailak. Aurten parte hartu behar zuten zortzi emakume antzerki talde amateurrekin batera atzo kaleratutako idatzian, oso berandu izan dutela horren berri kritikatu dute antzerki eskolako arduradunek. "Beste dirulaguntza bat eskatzeko denborarik ez zaigu geratzen" diote. Halaber, "bizirik eta sendo jarraitzen zuen egitasmoaren aurrean" foru erakundeak erakutsitako "axolagabetasunagatik minduta eta umiliatuta" azaldu dira.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun