Atxilotu eta bilurrak jarrita eraman zuten komisariara Beatriz Fernandez. Anjel Otxoantesana presoaren bikotekideak adierazi zuenez, zazpi edo zortzi aldiz biluzteko agindu zioten bertan. "Kukubilko jartzera behartu eta egingo zidana ez zela atsegingarria izango ohartarazi ondoren, polizia emakumea nire atzean jarri eta hatzamarrak uzkitik sartu zizkidanean izan zen gogorrena", azaldu zuen. Gaineratu zuenez, makurtzera eta eztul egitera behartu zuten baginan zer edo zer zeraman egiaztatzeko, "aurkitutakoa legami hutsa baino ez zela ongi baino hobeto zekitela ere". "Poltsan zegoenik ere ez nekien, beste familiar batek prestatu zuelako paketea", aitortu zuen.
Horretaz gain, tratu iraingarria ez zela bakarrik atxilotuta egon zen 48 ordutara mugatu salatu zuen Fernandezek, hedabideek plazaratutakoa gogoratuz. Zehazki EITB aipatu zuen berak. "Legamia zela konfirmatu zela ere, nire izena eta familiarena drogarekin lotzen jarraitzen zuten. Egindako kalte moralak ez dauka konponbiderik", adierazi zuen haserre bizian.
Beatriz Fernandezek "tratu iraingarriak" egin zizkiotela salatuko du Frantziako epaitegian
Anjel Otxoantesana presoaren bikotekideari urte beteko espetxe zigorra sar diezaiokete espetxera sartzeko paketean 30 gramo "Royal" legamia aurkitu ziotelakoBeatriz Fernandez algortarrari gertatutakoa adibidetzat jarriz, euskal preso politikoei ematen zaien "tratu berezia" euren familiarrei ematen hasi zaiela salatu du Etxeratek. Anjel Otxoantesana presoaren bikotekidea irailaren 17an atxilotu eta bi egunez Creteil-eko komisarian eduki zuen Frantziako poliziak Fresnesera bere mutil-laguna bisitatzera joan zenean arropako paketean legamia aurkitu ziotelako. Bide batez, "estupefazienteak" sartu nahi izan zizkiola komunikabideetara zabaldu eta presoen familiarrak izaten diren mojen aterpetxea eta beste senideen ekipajeak miatzeko aprobetxatu zuen poliziak. Itziar Larraz abokatuak ostegunean Baionan egindako agerraldian adierazi zuenez, "iraingarria" izan zen komisarian Fernandezi eman zioten tratua. Hori dela eta, salaketa jarriko du Frantziako epaitegian. Horretaz gain, algortarrari urte beteko espetxe zigorra jar diezaioketela, ohartarazi du Larrazek, espetxean "debekatutako produktuak" sartzeagatik, eta baliteke bisitak egiten ez uztea. Pariseko epaitegi batean deklaratu beharko du azaroan. Abokatuaren ustez, leporatzen zaizkion gertakariekin bat ez etortzeaz gain, "neurrigabekoa" da erabakia.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun