Kepa Saratxaga, Endika Lejarzegi eta Arkaitz Goikoetxeari 22na urteko kartzel zigorra jarri nahi diete

Amnistiaren Aldeko Mugimenduko kideen hitzetan, "Kepak, Endikak eta Arkaitzek ere beti ukatu dute eraso horrekin zerikusirik daukatenik, komisariako zein epaitegietako deklarazio guztietan. Endikak Gorrondatxe tabernan lanean egin zuen gau osoa! Eta Keparen eta Arkaitzen lagun eta familiarrek ere berretsi dute egun eta ordu horietan Algortan zirela Gabonzahar gaua ospatzen".

Galdakaoko Guardia Zibilaren aurkako kale-eraso horretan, fiskalak dioenez, 50 koktel eta hainbat suziri bota zituzten, eta guardia zibil bat zaurituta gelditu zen erasoaren ondorioz, bigarren graduko erredurekin. Hori dela eta, 18 urteko espetxe zigorra eskatzen du bakoitzarentzat, sutea eragiteagatik, eta betse 4 urte guardia zibilari eragindako zauriengatik, beti ere lege terroristari jarraiki. Baita ere, 100.000 euro inguru, Guardia Zibilari kalte-ordain modura emateko, besteak beste.

Orain akusatutako gazteak, berriz, 2002ko urrian eta azaroan Ertzaintzak Ezkerraldean, Uribe Kostan, Durangaldean, Galdakaon, Basaurin, Bilbon... egindako polizi-operazioan atxilotu zituzten. Gainera, sarekadan atzemandako guztiek "tortura latzak salatu zituzten eta oihartzun nahikoa izan zuen salaketak hainbat komunikabideetan, Eusko Jaurlaritzatik ezkutatzeko sekulako ahaleginak egin zituen arren", Amnistiaren Aldeko Mugimenduak salatu duenez. "Horren ondoren Eusko Jaurlaritzak atxilotuen eskubideak bermatzeko 'protokolo' bat martxan jarriko zutela iragarri zuen, baina tratu txarreko salaketek jarraitu egin dute geroztik ere", kritikatu dute.

"Beste eskandalu izugarri bat"

Algortako Amnistiaren Aldeko Mugimenduak gogora ekarri duenez, sarekada eta tortura horien bidez Eusko Jaurlaritzak Ibarretxeren plana Espainiaren aurrean "legitimatu" nahi zuela, esan zuten bere momentuan Torturaren Aurkako Taldeak eta Askatasunak. "Terroristen" interesen alde jokatzeaz "faxista espainiarrek" egin zizkioten akusazioen aurrean, terrorismoaren aurkako paladin modura agertu nahi izatea egotzi zioten Lakuako gobernuari. "Horretarako ez zuen beste biderik aurkitu mugimendu abertzalearen gazte sail batzuk atxilotu, torturatu eta horren 'emaitzak' aurkeztea baino", diote amnistiaren aldeko mugimendukoek.

Ildo horretan, Ainara Gorostiaga, Mikel Soto, Jorge Txokarro eta Aurken Sola gazte iruindarrak "torturatu eta inputazio faltsuen bidez" espetxean 2 urte egin ondoren 2004. urte hasieran errugabeak zirela onartu eta kaleratu zituztenean "politikari guztiek holakoak onartezinak zirela esan zutela" ere gogoratu nahi izan dute.

Hori dela eta, oraingoan "beste eskandalu izugarri baten aurrean gaudela" diote. Euren hitzetan, "gazte hauek beren bizitzaren zati handi bat espetxean egin dezakete Eusko Jaurlaritzaren une bateko interes politikoarengatik. Ertzaintzaren muntaia polizial-juridiko hau ez da lehena eta ez da beharbada azkena izango. Baina gure esku dago kasu hau ere salatu eta zapalketari aurre egitea".

Hitzaldiak

Kepa Saratxaga, Arkaitz Goikoetxea eta Endika Lejarzegi eta beste sei gazteri egingo dieten epaiketaren harira bi hitzaldi izango dira Algortako Villamonteko Kultur Etxean.

Urriaren 21ean (osteguna) 19:30ean, Mikel Soto eta Jorge Txokarrok "beraiek egin ez zuten ekintza bategatik torturatu eta espetxean bi urtetan bizi izandako esperientzia" azalduko dute. Urriaren 28an (osteguna) 20:00etan, berriz, "kale-borrokaren inguruan egindako gazteen kriminalizazioa eta ezartzen zaien bizitza osorako espetxe zigorren" nondik-norako politikoen gainean hitzegingo dute Gurasoak elkarteko kideek.

Hitzaldi hauen bidez Algortako Amnistiaren Aldeko Mugimenduak hiru gauza salatu nahi ditu (oihu@ agenkari elketronikoan (2004 Urr 08) plazaratutakoa hitzez hitz):

"1) Akusazio faltsuez interes politiko zehatz batzuen arabera egiten diren montaia polizial-politikoak.

Mikel Soto eta Jorge Txokarro holako muntaia bat bizi izan dute, eta beraiek bizitako esperientzia, atxiloketan eta espetxean azalduko dute.

Izan ere, Mikel Soto, Jorge Txokarro, Aurken Sola eta Ainara Gosrostiaga iruindar gazteak 2002ko otsailean atxilotu, torturatu eta espetxeratu zituzten.ETAko Urbasataldeko kide izatea eta Leitzako UPNko zinegotzi Jose Javier Mujika hiltzea leporatu zieten komisarian torturaz sinarazitako autoinkulpazioetan oinarrituta.

Gazte hauek inputazio horiek ukatu zituzten epailearen aurrean deklaratu zutenean. 5 egun egin zituzten inkomunikatuta eta torturak salatu zituzten.

2004ko martxoan libre utzi zituzten, espetxean bi urte baino gehiago egin ondoren, inputazio horiek beraiei kendu eta beste preso batzuei leporatu zietenean. Izan ere, Frantziako Poliziak egindako txosten baten arabera, Ibon Fernandez Iradiri atzemandako agiri batzuetan oinarrituta, hilketa hori Frantzian preso diren Andoni Otegi eta Oscar Zelaraini leporatzen zaie orain.

Kepa, Arkaitz, Endika eta beste gazte hauek holako muntaia baten aurrean daude.

2) Kale-burrukaren inguruan atxilotutako gazteek jasotzen duten bizitza osorako espetxe zigorra, kutxazain batzuk, autobusen bat edo holako ekintzak egiteagatik, askoz kontu larriagoak egiten direnei askoz zigor txikiagoak sartzen zaienean. GURASOAK elkarteak kanpaina oso luzea egiten ari da gai honen inguruan, euren seme-alabeen eskubideak aldarrikatuz. Oso sistema argi baten aurrean gaude: GAZTEAK KRIMINALIZATU=EPAIKETA POLITIKOAK=BIZITZA OSORAKO ESPETXE ZIGORRA.

Gure eskualdean Orkatz Gallastegi eta Martin Etxegarai dira errepresio mota honetan kaltetuenak. Orkatzek 17 urteko espetxe zigorra sartuta dauka dagoeneko, eta beste hiru epaiketa gehiago izango ditu. Martinek 8 urteko espetxe zigorra dauka.

3) Torturak muntaia eta zigor hauetan guztietan jokatzen duen papera. Tortura arma politiko gisa erabiltzen dute polizia guztiek Euskal Herriaren askatasunaren aldeko burrukaren kontra".

Informazio gehiago:

e-mail: oihua@barrutik.org

Oihu@ artxibategia: fitxategi guztiak