Etxe propiorik eduki ez, edo izanda ere, egoera txarrean daukaten; edota mugikortasun arazoak izanik ere beren kabuz baliatu daitezkeen lagunentzat dira babespeko etxebizitzak. Iñaki Zarraoa alkateak aditzera eman duenez, "herriko erdigunetik hurbil egon daitezen saiatzen gara gizartearekin harremanetan jarraitu eta bakartu ez daitezen. Funtsean, pisuak bi lagunentzako dira, ezkonkideak izaten baitira berauek betetzen dituztenak".
Tutoretzapeko etxebizitza hauek eskuratzen dituzten pertsonek giza errenta bat ordaindu beharko dute eraikinaren mantentze gastuei aurre egiteko. "Euren eskura dagoen errentasaria ezarriko dugu, baina horrek ez du esan nahi ordaindu ezin duenak kalean geratuko denik, Gizarte Zerbitzuek eurek lagundu egingo baitute", Zarraoak zehaztu duenez.
Getxoko Udalak lehiaketa deitu du Itzubaltzeta / Erromoko Luis Lopez Oses kaleko maisuen etxea izandakoaren zaharberritze lanak esleitzeko. Besteak beste, tutoretzapeko 20 etxebizitza berri egokitu (43,5 eta 34,5 metro koadroko azalerakoak), teilatupeko 28 ganbara egin eta igogailua jarri nahi dute. Hasiera batean, eraikinean zeuden 16 etxebizitzetatik bi adimen urrikoen alde diharduen Uribe Kosta Elkarteari utzi zizkion udalak. Ondoren, zortzi tutoretzapeko apartamendu egokitu zituen lehen solairuan, berandu baino lehen esleituko direnak, udal arduradunek aipatu dutenez. Duela urte batzuk, Erromoko Nagusien Etxean egin ziren beste 11 etxebizitza ere gehitu behar zaizkie hauei. Oraingo 20ak egokitzeko 470.000 euro izendatuko ditu aurtengo eta 634.000 euro 2005rako Getxoko Gobernu Batzordeak.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun