Gaur goizean egindako aurkezpen ekitaldian, Jose Antonio Agirreren irudiak duen garrantzia goraipàtu du Iñaki Zarraoa Getxoko alkateak. Besteak beste, politikagintzara bertoko udal mandataria izanik iritsi zela azpimarratu du eta, hortik, Eusko Jaurlaritzako aurreneko lehendakaria izan zela. Erbestean zegoela, gaur egun Europako Batasuna bezala ezagutzen denaren sustatzaileetako bat ere izan zela nabarmendu du Zarraoak. "Lagunek zein arerioek traza handiko politikotzat jo dute beti Agirre", adierazi du. Halaber, Bilbon jaio zen arren, getxoztartzat hartua izan dela azpimarratu du alkateak, bertoko udal mandataria izateaz gain, bere bi seme herrian bizi direlako.
Josebak, Jose Antonio Agirreren seme nagusiak, berriz, erakusketan ikusgai dauden idatzien garrantzia azpimarratu du. Hauek "De Gernika a Nueva York, pasando por Berlín" titulupeko liburua osatu zuten eta bertan Europan zeuden indar faxistengandik ihes egiten zegoela egunez egun bizi izandakoa azaltzen da. Aipatu idatziak, naziek harrapatu ez zitzaten, bere arreba Aintzanek zeukan panpinaren buru barruan atera behar izan zituztela gogoratu du Joseba Agirrek.
Horretaz gain, Agirre familiarentzat urria hilabeteak duen garrantzia ere aipatu du Getxoko alkate eta Eusko Jaurlaritzako aurreneko lehendakaria izan zenaren seme nagusiak. Besteak beste, 1936ko urriaren 1ean Gorte Espainiarretan lehen euskal estatutoa bozkatu zelako eta sei egun geroago, urriaren 7an, "Francoren kontrako indarren lehen euskal gobernua osatu zelako" Gernikan. Bestalde, 1839ko urriaren 25ean, Jose Antonio Agirreren hitzetan, "monarkia borbonikoak Euskal Herriari foruak kendu zizkion" eta azkenik 1987ko urriaren 6an Mari Zabala, Jose Antonio Agirreren emaztea hil zen. Seme nagusiak, Josebak omenaldi bat eskaini nahi izan dio gaur.
Jose Antonio Agirreri buruzko liburua kaleratuko du Getxoko Kultur Etxeak
Bere jaiotzaren mendeurrenarekin bat eginez, Jose Antonio Agirre Athletic-eko jokalari, udalerriko alkate eta Eusko Jaurlaritzako aurreneko lehendakaria izan zenaren omenezko liburua argitaratuko du Getxoko Kultur Etxeak. Udal getxoztarrak osorik ordainduta, Elias Amezaga idazle ospetsuak sinatuko du lana eta "ikuspegi gizatiar batetik Agirreren bizitza eta izaerara hurbilpena egin nahi dute".
Horretaz gain, Areetako Mesedeetako Amaren elizaren arkitekturari eta ehun urte beteko dituen Artzain Jainkotiar Amaren ikastetxeari buruzko beste bi liburu argitaratuko dituzte hemendik gutxira.
Aurreneko lehendakariaren "mundu-mailako euskal buruzagi politikoaren irudia" goraipatu nahi dute "Pro libertate patria... Jose Antonio Agirre" erakusketaren bitartez
2004ko urr. 14a, 23:17
Ostiral honetatik aurrera eta azaroaren 17ra bitartean egongo da ikusgai BBKk Algortako Torrene kalean lehen zuen egoitzan "Pro libertate patria... Jose Antonio Agirre" goiburua hartzen duen erakusketa. Bere jaiotzaren mendeurrena betetzen den honetan, Eusko Jaurlaritzako lehenengo lehendakariaren bizitza eta burutapenak laburbildu nahi izan ditu Sabino Arana Elkargoaren Euskal Abertzaletasunaren Museoak, Getxoko Udalaren laguntzaz. Asier Mendieta aipatu erakundeko kide eta erakusketaren arduradunak adierazi duenez, jada aski ezaguna den ikuspegia lantzeaz gain, "pentsamolde erabat gaurkotua zuen mundu-mailako euskal buruzagi politikoaren irudia" berreskuratu nahi izan dute erakusketaren bidez. Horrela, Benes, Adenauer, Churchill, De Gaulle eta Roosvelen aipamenak ere bildu dituzte, "sasoiak eta idealak konpartitu zituen mundu-mailako liderrak alegia". Hain zuzen ere, Agirreren eta bere garaikideen objektu, girotze eta idatzizko aipuen bitartez, erakusketak ibilbide kronologikoa egiten du bere bizitzan zehar, hiru ataletan banatuz: "Pertsonaiaren gaztetasuna eta konpromiso politikoa", "Lehendakari zin egitea, gerra eta erbestaldia" eta "Euskaldunen esku-hartzea Munduko Bigarren Gerratean eta 1960an zendu zen arteko Europa batuaren aldeko Agirreren apostua". "Pro libertate patria... Jose Antonio Agirre" erakusketa astelehenetik ostiralera bisitatu ahal izango da, 10:00etatik 13:00etara eta 17:00etatik 21:00etara. Eta larunbatetan 11:00etatik 14:00etara eta 18:00etatik 21:00etara. Igandeetan eta jai egunetan itxita egongo da. (Argazkian, ezkerretik eskuinera, Iñaki Zarraoa, Joseba Agirre eta Asier Mendieta)Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun