Getxoko XXII. Antzerki Jardunaldiko antolatzaileek emanaldi oro jasotzen duen programa aberatsa osatu dute; gai, genero, hizkuntza edo antzerki eremu bat edo beste izan, obra asko ikusleek berek babestu dituzte estreinatu zirenetik. Horiek hala, jardunaldi horiek italiar erako antzerkia eta kale antzerkia bilduko dituzte; obra klasikoak eta garaikideak; komediak eta dramak; barneko antzezlanak, antzerki lan handiak, euskarazko eta gaztelaniazko lanak eta, azken batean, eskaintza askotariko batek jaso dezakeen guztia.
Lan nagusien artean daude, besteak beste: Ados Antzerki Taldearen “Dekameroia” / “El decamerón”; T(arte)an konpainiaren “Sonata en un segundo... y pico”; Kanpingags taldearen “Ezetz lepoa jarri!” / “Por los pelos”; eta Tanttakaren “Paradero desconocido”. Eta estreinaldiak ere egongo dira, Deabru Beltzak taldearen "Hadi hadi" antzezlana, hurrenez hurren.
Horietariko berriena “Dekameroia” da eta horrek zabalduko ditu jardunaldiak. Boccacioren lanik garrantzitsuena da. Florentzian girotzen da, 1348. urtean, izurritea zabaldu zen urtean. Horretaz babesteko, ondo hezitako lagun talde bat hiritik kanpo dagoen etxe batean ixten da. Antzezlan errespetugabea eta bizi-pozaduna da, eta ikusten da nola erabili behar den barrea heriotzaren aurkako antitodo gisa. Garbi Losadak zuzendu du antzezlan hori, eta Javier Barandiaran, Josean Bengoetxea, Jon Ezkurdia, Alvaro Garaialde eta Martxelo Rubio dira antzezleak.
Haurrentzako emanaldiak
Haurrak dira etorkizuneko ikusleak, eta orain ere hainbat emanaldi berezi egongo da txikientzat. Lan dibertigarri asko izango da, besteak beste: “Giriguai!”, “Ibaitxu, burdinaren lamia”, “Kuko, Truko eta Bolenwaider... munduan zehar”, “Historias de juguetes”, “Circo Kapikua”, “Adi Adi”, “Klaketa” eta “Errauskine”. Txotxongilo, zirku ikuskizun eta pailazo emanaldiak izango dira.
Hain zuzen ere, ikusle berriak erakartzeko jarri dituzte haurrentzako emanaldiak eta kale antzerkia. Getxo Antzokian izango diren antzezlanetarako ere "guztien eskura dauden salneurriak" jarri nahi izan dituzte, antolatzaileek aipatu dutenez.
Herriko talderik ez
Aurreko urtetan udalerriko antzerki talde bat edo beste parte hartu duen arren, aurtengoan bertoko konpainiarik ez dago Getxoko Antzerki Jardunaldietan. Hala ere, agertokira igoko diren taldeen artean getxoztarrak badaude. Besteak beste, Garbi Losada algortarrak zuzendu du Adosen "Dekameroia", eta Kanpingags taldean Asier Hormaza ere badago.
Adosen "Dekameroia"k emango die hasiera bihar Getxoko XXII. Antzerki Jardunaldiei
Euskal antzerki taldeek egindako lan aberatsaren berri emateko asmoz, Getxoko XXII. Antzerki Jardunaldiak ospatuko dira urriaren 15etik 24ra bitartean. 1989tik gaur egunera, euskarazko antzerkigintzaren "erakusleiho garrantzitsua" bilakatu dira aipatu jardunaldiak, antolatzaileek aipatu dutenez. Hain zuzen ere, 12 antzerki taldeek eskainiko dituzten 14 lanetatik erdia izango da euskaraz, sei gaztelaniaz eta bat ahotsik gabe. Nagusientzako eta haurrentzako antzezlanak egongo dira ikusgai, datozen egunetan, Ados, Tanttaka, Kanpingags edota Zirko Tippia antzerki konpainien eskutik, besteak beste, hiru agertokitan. Lan nagusiak Getxo Antzokian izango dira eta horiek soilik ordaindu beharko dira. 8,50 euro balio dute; 6,50 gazte txartela dutenentzat eta erretiratuentzat (Teleka bidez, 94 431 03 10 / 94 491 40 80 telefono zenbakietan edota antzokian bertan eskuragarri). Areetako musika eskolan txotxongiloak eta haurrentzako beste lan batzuk emango dituzte. Azkenik, Algortako Telletxe plazan kale antzerkia egongo da.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun