Ikusleak ere partaide izango dira "Ezetz lepoa jarri!" antzerki-lanean

Erabiltzailearen aurpegia
Getxoko XXII. Antzerki Jardunaldien barruan, "Ezetz lepoa jarri!" egongo da ikusgai ostiral honetan, 20:00etatik aurrera, Algortako Getxo Antzokian. Kanpingags taldearen azken lanak umorea eta suspesea nahasten ditu. Gainera, ikusleek berebiziko garrantzia izango dute antzerki-lanaren garapenean, eurek izango baitira aukera bat edo beste hartuz istorioaren amaiera erabakiko dutenak. Horrela, obrak izan ditzakeen bukaera anitzen aurrean, ikusleen gaitasuna probatu egingo dute Joseba Apaolazak, Kontxu Odiozolak, Jose Ramon Soroizek, Ainhoa Aierbek, Kiko Jauregik eta algortarra den Asier Hormazak. Txartelak 8,50 eurotan egongo dira, gazteentzat eta erretiratuentzat izan ezik. Azken aurrek bi euroko beherapena izango dute.
Istorioa ile-apaindegi batean ematen da non hilketa bat dagoen. Eta noski, hiltzailearen berri ez du inork jakingo. Bertan lagun bat baino gehiago egongo da eta legearen ordezkariek guztiak joko dituzte susmagarri, horretarako makina bat arrazoi egongo direlako. "Une jakin batean, aretoko argiak piztu eta ikusleek hiltzailea nor den asmatu beharko dute. Pista asko daude eta obraren amaiera plateako botoak erabakiko du", azaldu du Asier Hormazak.

Garai latzak dira. Ia egun batetik bestera gure bizimoduak hankaz gora jarri ditu birus batek, eta kolokan daude gauza asko. Hedabideontzat ere ez dira garai gozoak, noiz eta gure lanaren beharra inoiz baino agerikoagoa denean. Horregatik, zure laguntza materiala ere behar dugu aurrera jarraitzeko.

Honenbestez, HIRUKAlagun egitera animatzen zaitugu, urtean 35 euroko ekarpena eginda, edo gure 5. urteurrena dela eta martxan ipini dugun Eman Bostekoa HIRUKAri kanpainan parte hartzera (bost euroko ekarpena eskatuko dizugu). Horretarako, jarri gugaz harremanetan administrazioa@hiruka.eus helbidera mezu bat idatziz.


Izan zaitez HIRUKAlagun