- Ta nongoa zara?- Berangokoa…
- Ah! Image-aren herria!
Hori da Berango hainbat gazterentzat. Eta ez da harritzekoa. Berango gutxi gora-behera 5.000 biztanle ditu, azken hamarkadan demografi hazkunde nabaria izan duelarik. Baina berangoztarren bizi kalitatea hobetu egin da? Populazioa hazten doa, etxe ugari (gehienak luxuzkoak eta bizpahiru babes ofizialekoak) eraikitzen dira baina zerbitzuak aldiz, ahazturik.
Esan dezakegu Berango kale soil batera murrizten dala, Sabino Arana alegia. Berton daude denda gutxi batzuk, tabernaren bat, pilotalekua eta metroa. Herriak duen bizi bakarra kale horretan somatzen da (Axganen ere, nolabait, jendea ikusten da kaletik) Berangon ez dago plaza nagusirik, herritarrentzako bilgunerik, elkarretaratzeko lekurik…
Aipatutako Sabino Arana kalea oinezkoentzat egokituko dutela diote, ikusiko dogu…
Berangoko hedadura ez da makala, eta etxe guztiak (gehienak unifamiliarrak, txaletak edo baserriak) herrian zehar sakabanatuta daude. Beraz, ez dago lonjarik, dendarik, zerbitzurik… bizitzarik! Berangoztar berriek ez dute bizitza herrian egiten, “ciudad-dormitorio” delakoa bihurtu delarik. Ez dugu kiroldegirik, musika eskolan pianoa soilik eskeintzen dute, ez dago unibertsitaterako autobusik… duela gutxira arte Algortaraino joan behar izaten ginen fotokopia batzuk egiteko! (auto eskolan eta estankoan egin ditzakegu orain…) Ta guzti hau 5000 biztanle duen herri batean.
Gazteei dagokionez, gauetan inguruko herrietatik gazteak etortzen dira, ta hori da Berangora etortzen diren aldi bakarra… gaztetxe baten beharra daukagu! Herriari bizi apur bat emoteko. Luxuzko etxe gutxiago gura ditugu, ta lonja zein zerbitzu gehiago. Txikitan “txaletolandia” esaten genion herriari, ta egun eraikitzen ari diren etxe guztietan ez da lonjarik egiten. Ez da, beraz, dendarik sortzen.
Zorionez, zerbitzuen eskasia udaltzaingoaren kasuan ere ikusten da…
Beste egunean Bilboko batek honako hau galdetu zidan: baina Berango ez da Getxoko auzoa?
Ezetz erantzun nion, baina arrazoi apur bat bazeukan, Berango ez baitauka herri baten itxurarik. Horixe nahi dogu, hazkunde demografikoarekin batera dendak, zerbitzuak eta plazak ere gehitzea.
- Ta nongoa zara?
- Berangokoa.
- Ah! Image-aren herria!
- Bai, ta kiroldegiarena, musika eskolarena, zinemarena, gaztetxearena, antzokiarena eta abar luze batena ere.
Hura bai miraria!
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun