Orain urte batzuk hitzarmena sinatu zuten Getxoko Udalak eta Bizkaiko Foru Aldundiak, pixkanaka pixkanaka foru erakundearenak ziren udalerriko errepideak udalaren eskuetan uzteko. Momentuz horrelako ekimenak aurrera eraman dituzte Algortako Etorbidean (Triangelutik Sarrikobasoraino) eta Malakatetako etorbidean (Fadurako errotondatik Triangeluraino).
Bestelako zirkulazio aldaketak
Ostiral honetan (azaroak 5) hainbat lan egingo dituzte Getxo auzoko Galearako errepidean, oinezkoen eta ibilgailuen zirkulazioaren baldintzak hobetzeko asmoz. Besteak beste, kalea identifikatzeko plaka eta "Ibiltzea debekatuta garajeak izan ezik" dioen zutikako seinaleztapena ezarriko dute. Horretaz gain, "sarbide debekatua" dioen plaka ezarri eta jardinerak kenduko dituzte, Aixerrota kalea Aingeruaren etorbidearekin bat egiten duen tokian.
Beste alde batetik, ibilgailuentzako norabide bakarra ezarri dute Gobelbide kalean, Leioako etorbiderako norabidean, trafikoko baldintzak hobetzeko. Aipatu neurria gaur bertan sartu da indarrean.
Azkenik, urriaren 28an sartu zen indarrean Algortako Arkotxa kalean (Foruak eta Martikoena artean) ibilgailuentzako norabide bakarra jartzeko erabakia. Aparkatzeko lekua kalearen albo batean mantendu dute.
Aipatu neurriengatik sor daitezkeen eragozpenak direla eta barkamena eskatu du Getxoko Udalak.
Getxoko Udalak ur eta estolderia lanak egiten ari da gaurtik aurrera Zugazarte etorbidean. Aurreikusi dutenez lanak lau hilabetez luzatuko dira. Estolda berriak espaloiaren eskumako aldean jarriko dituzte, hau da, Algortatik Areetarako norabideko eskuma aldean, 1 eta 65 zenbakien artean, hain zuzen ere. Obrak egiteko espaloiaren eta errepidearen zati bat erabili behar dutenez, egunero 150 metrotan zehar bidea moztuko dute. Lanak burutu ondoren Bizkaiko Foru Aldundiak beste motatako ekimenak eramango ditu aurrera etorbidean. Izan ere, foru erakundeak dauka oraindik bertoko mantentze-lanen erantzukizuna. Horiek burutu ondoren Zugazarte etorbidea Udalaren ardurapean geldituko da.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun