Orain arte ehundik gora alegazio aurkeztu dira jada udal erregistroetan eta beste horrenbeste bilduta daude hurrengo egunetan erregistratzeko prest, Getxo Bizia herri plataformako kideek jakinarazi dutenez. Euren hitzetan, "soldatak errez igotzen dituzten bezala, mandatari neoliberalek herritar xeheari aterarazi nahi diote azken izerdi tanta". Izan ere, udal zerbitzu guztien prezioa kostuarekin parekatu nahi izatea egotzi diete tokiko agintariei, "aberastasunaren birbanaketa ekiditu eta diru sarrera arruntak dituenari zerbitzuez gozatzeko aukerak mugatuz".
Gogoratu dutenez, urtarrilean %30 igo zuen zarama bilketarako tasa Getxoko Udalak. Ondorioz, "berdin berdin ordaintzen du 60 metro koadroko etxebizitzan zein Neguriko lorategidun jauregian bizi denak", adierazi dute. Datorren urte hasierarako, berriz, igerilekuetara sartzeko euro bat ordaindu behar izateaz gain, orohar, Fadurako tasa guztiak %10 igoko dira, "aisialdia eta osasuna gero eta garestiago eginez" ezker abertzaleko kideen hitzetan. Azken urteotan Jesusen Biotza Udal Egoitzan izango diren tasa igoera "nabarmenak" ere gogoan izan dituzte.
Aldaketa guzti horiek onartzeko, "herritarrek hauteskundeetan bozkatutakoa aintzat hartu gabe, Getxo Biziari dagokion zinegotzi postuaz baliatzea" leporatu diete udal gobernua osatzen duten EAJ, EA eta EB alderdiei. Hori dela eta, "agintarien gehiegikeriei aurre egiteko eta apartheid egoerarekin lehenbailehen bukatzeko", alegazio kanpainan parte hartzera deitzen dituzte getxoztar guztiak.
Tasa berrien kontrako alegazio kanpaina abiarazi du Getxo Biziak
2004ko aza. 5a, 22:01
Iraileko udal batzarrean behin-behinean onartu ziren datorren urterako tasa eta zerga berriak direla eta, horiei erreklamazioak aurkeztera herritarrak bultzatzeko kanpaina abiarazi du Getxo Bizia herri plataformak. Horrela, udaletxeko eta udal bulegoetako erregistroan azaroaren 11a baino lehen aurkezteko eredua prestatu dute ezker abertzaleko kideek. Erreklamazio orriak aipatu erakundeak Algortako Torrene kalean daukan bulegoan edota auzo horretako zein Itzubaltzeta-Erromoko lokaletan egongo dira eskuragarri. Gainera, igande honetan (azaroak 7), mahai bat jarriko dute Telletxe plazan. Udal tasen eta zergen igoera "gehiegikeritzat eta iruzurtzat" jotzen dute Getxo Biziakoek.Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun