Unibertsitatean jazarpen indarkeriaren inguruko txostena ez dela nahikoa adierazi dute PPk eta PSE-EEk
Euskal Herriko Unibertsitatean jazarpen indarkeria aztertzen duen txostena aurkeztu zuten herenegun,
Eusko Legebiltzarreko Hezkuntza Batzordean, Txema Urkijo
Giza Eskubideen eta Justiziarekiko Lankidetza zuzendariak eta Maixabel Lasa Terrorismoaren Biktimei Laguntzeko zuzendariak. Bertan aipatzen denez, azken urteotan egoera "lasaitu" egin da
EHUn, langileei egindako mehatxuei eta presioei dagokienez. Hain zuzen ere, gizartearen gainontzeko alorretan egondako aldaketarekin lotu zuen unibertsitateko egoera berria Urkijok. Hala ere, ETA desagertzen ez den bitartean egoera ez dela "normala" izango adierazi zuen. Txostenaren bidez, 2002an arazo horri aurre egiteko Legebiltzarrean onartu ziren proposamenak bete egin direla frogatu nahi izan du Jaurlaritzak. Argazkian, Txema Urkijo.
Giza Eskubideen eta Justiziarekiko Lankidetzarako zuzendariak esadakoaren arabera, unibertsitateko langileen segurtasunaren arazoa "zailagoa" da, "lantoki eta ordutegi finkoak dituztelako". Hala ere, irakasleen eta gainerako langileen segurtasun arazoak "ondo landuta" daudela azpimarratu zuen. EHUko segurtasuna bermatzeko, kamerak eta aparteko zaintza-neurriak jarrita ditu Jaurlaritzak. Gainera, Urkijok jakinarazi zuenez, langileen errutinak hausteko eszedentziak eta bestelako neurriak bultzatu dituzte.
PP eta PSE-EEren kritikak
Iñaki Ortega PPko parlamentarioak, aldiz, txostenak ez dituela helburuak betetzen adierazi eta "azalekotzat" jo zuen. Horrekin batera, ETAko presoek EHUn matrikulatu ahal izateak ez diela mehatxatutako irakasleei laguntzen salatu zuen.
Azkenik, Giza Eskubideen eta Justiziarekiko Lankidetzako batzordeak egindako lanaren borondate ona nabarmendu arren, emaitza ez dela "behar bezalakoa" salatu zuen Isabel Celaa sozialistak. Erruaren zati handi bat Anjeles Iztueta Hezkuntza sailburuari egotzi zion, "ez duelako gaiari heltzeko borondaterik".
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun