Getxoko XXIX. Nazioarteko Jazz Jaialdiak (Getxo Jazz) ireki du 2005eko Talde Lehiaketan izena emateko epea. Edizio berria datorren urteko uztailaren 1etik 5era bitartean egingo da. Horrela, otsailaren 19a arte izango dute izena emateko epea parte hartu nahi dutenek. Jazz musika interpretatzen duten edozein joera edo estiloko Europako taldeei irekita dago eta parte hartzeko adin-muga 30 urtekoa da (2005ean beteak). Datu hori izena ematean egiaztatu beharko da.
Taldeak bere kalitatea egiaztatzen duen materiala ere aurkeztu beharko du, CD edo zinta batean, kideen argazkiarekin batera. Argazkian, Jazz Sextet of Rostov (Errusia) aurtengo irabazleak.
Eskaera guztiak jaso ondoren, Getxo Jazzeko epaimahaiak behin-betiko aukeraketa egingo du martxoan hautagai guztien artean, eta hilabete horretan bertan jakinaraziko du azkenean Talde Lehiaketan parte hartuko duten lauen izenak.
Hautaturiko talde bakoitza jaialdiaren lehen lau egunetan joko du, eta irabazlea berriro arituko da azken egunean. Sariei dagokienez, irabazleak 3.000 euro eta garaikur bat jasoko ditu. Gainera, bere kontzertuaren zuzeneko CD bat grabatuko da.
Bigarren saria 1.200 euro eta garaikur bat izango da. Azkenik, bakarlari onenak 600 euro eta garaikur bat eskuratuko ditu. Horrez gain, talde irabazleak Hoeilaart (Belgika) eta Ibizako (Espainia) jazzaldietan joko du, Getxo Jazzek bi jaialdi horiekin duen lankidetzarako akordioari esker.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun