Erandioko Udalak onartuta daukan EBPNren harira, 2004ko kudeaketa planaren garapena eta datorren urteko planaren prestaketa izan zituzten aztergai urriaren 26ko batzarrean. Urtean zehar, euskararen alorrean herrian egindako urratsak nabarmendu zituzten arren, oraindik ere hainbat hutsune daudela onartu zuten batzordeko kideek. Besteak beste, Udal Musika Eskolan euskararen erabilera bermatzeko plangintza zehatz baten beharra dagoela ondorioztatu zuten. Hain zuzen ere, bertan ibiltzen diren ikasle gehienak D eta B eredukoak izan arren, entzunaldietan eta ikasgeletan ez delako euskaraz egiten eta material guztia erderazkoa delako.
Hala ere, Euskararen Aholku Batzordea aurrera doala argi geratu zen. Herriko hainbat elkartek eta parrokiek euskara planak egiteko erakutsi duten pretutasuna ez-ezik, partaide berriak ere izan ziren azken bilkuran. Horretaz gain, euskara teknikari berriaren aurkezpena egin zuten bertan. Ana Fernandez izango da Fernando Simonekin batera Euskara Zerbitzuko teknikari.
Urriaren 26an egindako bilkurari jarraipena emanez, Erandioko udalbatza-aretoak hartuko du, gaur 20:00etatik aurrera, Euskararen Aholku Batzordearen batzar berria. Euskararen Biziberritzeko Plan Nagusiaren (EBPN) helburuak lortzeko, Udalari aholkuak ematea da horren eginkizuna eta zabalik dago gaian interesa daukaten pertsona guztientzat. Oraingoan, 2005eko kudeaketa planean sartu beharreko neurri eta ekintzen gaineko proposamen zehatzak jaso nahi dituzte udal ordezkariek.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun