Saharar errefuxiatuentzako jakiak batzeko kanpaina otsailaren 20ra arte luzatuko da. Gainera, Imanol Landa Getxoko Udaleko Presidentzia zinegotziak azaldu duenez, merkataritza zentroetan egingo dutenaz gain, ikastetxetan ere izango du eragina. Dagoeneko eman dute horren berri hezkuntza zentroetan.
Edonork har dezake parte kanpaina. Horretarako, ATFAL elkartearekin (655 740 681) eta Getxoko Udal Gizarte Zerbitzuekin (94 466 01 30) harremanetan jartzeko aukera dago.
Landak azaldu duenez, Aljerian dauden Tinduf-eko kanpamenduetan beharrizanen %11 suposatzen du jakien eskasiak. "Gehienbat umeengan eta haurdun dauden edota seme-alabei bularra ematen dieten emakumeengan du eragina", adierazi du.
Bizkaiko Sahararen Aldeko Elkarteen Koordinadorak eta Fronte Polisarioak antolatutako Karabana Solidarioaren harira, saharar errefuxiatuen kanpamentuetara bidaltzeko elikagaiak batzeko kanpainarekin bat egin dute Getxoko Udalak eta aipatutako herriko Atfal eta Leioako Fath elkarteek. Besteak beste, abenduaren 3an arroza eta atuna oliotan batuko dute Berangoko Eroskin. Beste horrenbeste egingo dute hilaren 10an eta 11n Artea merkatalgunean, eta 22an eta 28an Leioako Abantzadakoan.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun