Ukapen eta bazterketa hauen bitartez benetako heriotz zibilera ari dira zigortzen Getxo Bizia eta 2.756 herritarrak. Herriaren zati bat baztertuz hautespen unibertsalaren printzipioa ezerezean geratzen da. Indarrean dagoen ordezkaritzaren zilegitasuna hautsita dago eta eguneroko kudeaketan bezala aparteko gai garrantzitsuetan ere bai, Getxoko Udal Gobernua lapurretan oinarritutako gehiengo faltsuaz baliatzen ari da.
Konponketarako bada bide posible eta errealista bat. Hautes legearen 182.2 artikulua erabiliz, Pili Askorbebeitia gure zerrendaburua eta udal hautetsia izendatua izan daiteke ofizialki Getxoko Udaleko zinegotzi. Horretarako eta lehenengo pausu gisa ezinbestekoa da Ezker Batuako Aitor Lafuente, hautesle guztien bozak kontuan hartuz 25 kideen batzarretik at geratutakoaren dimisioa.
Orain arte ez dugu ez EA, ez EAJ, ez EBtik erantzun positiborik izan, ez guk argiki proposatzen dugun zinegotzi ordezkapena bultzatzeko, baina ezta bazterketa gainditzeko bidean aurrerapausua suposa zezakeen bestelakorik ere. Poltronetan eta gehiengo faltsuak ahalbidetzen dien botere gunean gotortzen ari dira. Emaitzak getxoztarren mobilizazioaren ondorioz etor daitezke bakarrik.
Horrexegatik apartheida salatu eta konponbidea bultzatzeko, abenduaren 11n zapatua eguerdiko 13etan KONTZENTRAZIOA deitu dugu Telletxen.
Azaroaren bukaeran urte ta erdi bete da 2003ko maiatzaren 25ean hautes-ontzietan 2.756 getxoztarrek Getxo Bizia herri plataformaren alde egin zutenetik. 18 hilabete apartheid, boz kopuru horri dagokion ordezkaritza ukatu egiten baitzaigu oraindik. Are gehiago, handicap handiz jokatu genuen arren, lehiakide izan genituen indar politikoetatik bakar batek ere ez du inoiz publikoki aitortu zeintzu izan ziren egun hartako egiazko hauteskunde emaitzak eta hauen arabera nola osatu behar den Getxoko Udal Batzarra.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun