Ikerketan osasun-adituek biktimari egindako probetan merkurio maila handia aurkitu zioten, gizakia hiltzeko adinakoa, polizia iturrien arabera. Pozoia etenik gabe ematen omen zioten, apurka-apurka. Azterketa horiek egin eta gero, Gurutzetako Ospitalera eraman behar izan zuten biktima.
Lehen emaitzak ikusita, Ertzaintzak emakumearen alaba atxilotu zuen, ama hiltzen saiatzea leporatuta. Familiako beste zerbitzarietako bat ere atzeman zuten, baina deklaratu ondoren aske geratu zen. Getxoko Epaitegian deklarazioa hartu eta gero, emakumearen alaba Langraizeko espetxean sartzeko agindua eman zuen epaileak.
Langraitzeko espetxean dago jada astelehenean Ertzaintzak atxilotu zuen 52 urteko emakume getxoztarra, merkurioa erabiliz ama hiltzen saiatzea leporatuta. Eusko Jaurlaritzako Herrizaingo Sailak jakitera eman duenez, ikerketa ekainaren 23an abiatu zuten, biktimaren neskameetako batek salaketa jarri ostean. Dirudienez, merkurio-bolak aurkitu zituen 78 urteko emakumearen gosarian, opil artean, eta biktimaren ahoan ere atzeman omen zituen merkurio arrastoak. Berehala, Ertzaintzari jakinarazi zion.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun