Aipatu berrikuntzetarako 2.623.000 euro inbertitu ditu Getxoko Udalak. Izan ere, estalkia bera jartzeko lanak (700.000 euro) ez ezik; igerilekuan bertan, inguruetan eta makineria eraikinean egindako obra zibila (1.499.000 euro); indar eta argiztapen instalazioa, filtroen garbiketa eta aire-egokitzea (424.000 euro) ere hartu ditu egitasmoak.
Bazkideentzat bakarrik
Instalakuntza berria funtzionamenduan hasten denean, barneko igerilekuan egingo dituzte ikastaroak, entrenamenduak, igeriketa eta water-polo txapelketak. Kanpokoa, berriz, bazkideek soilik erabili ahal izango dute. Guzmán Aranaga Kirol zinegotziak azaldutakoaren arabera, etorkizunean igeri egiteko gune luzeetan banatuko da igerilekua, 50 eta 25 metroko kaleekin. Beste bi gune ere egongo dira: bata aisialdirako eta bestea haurrentzako. Azken hauen sakontasuna txikiagoa izango da.
Urtarrilaren bukaeran lanak eginda egotea espero dute udal agintariek, eta funtzionamenduaren nondik norakoak ezagutzeko frogak egin ondoren, erabiltzeko moduan egon daiteke 2005eko udaberrian, Gobela kiroldegia zabaltzen denean gutxi gorabehera. Data hori baino lehen, ateak zabalduko dituzte egin diren lan guztiak erabiltzaileei erakusteko.
Orain arte egin dituzten birmoldaketa lanei bukaera emateko, atzo goizean hasi ziren Fadurako Udal Kiroldegiko kanpoko igerilekua estaltzeko lanak. Orotara, 1.075 metro koadro (50 x 21,5) ditu aipatu azpiegiturak. Argia pasatzen uzten duen polikarbonato zelularreko estalkiak, berriz, 2.100 metro koadroko azalera izango du. Hortaz, 1.025 metro koadro geldituko dira igerilekuaren inguruan hondartza gunea deritzona jarri ahal izateko. Gainera, bi aldeetara zabaltzen da estalkia, alde bakoitzeko bost pieza mugitzen direlarik: horietako bat finkoa da eta gainontzeko laurak horren azpian batzen dira. Horri esker, udan izan ezik, urteko hilabete gehienetan estalita egongo da Fadurako kanpoko igerilekua.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun