Egizuk aurrera eramaten dituen ekimenak euskara ikasten ari diren pertsonei zuzenduta daude, baita bere garaian ikasi baina azkeneko urtetan gutxi erabili dutenei ere. Euskaldunek ere parte hartu dezakete.
2004 / 2005 ikasturtera begira, Getxo udalerrian euskara erabiltzen duten elkarte ezberdinen arteko harremanak sendotu nahi ditu Egizuk. Horretarako hurrengo hilabetetan hainbat ekitaldi egingo dituzte, hala nola, Euskal Herriko historiari buruzko tailerrak, literatura, sukaldaritza, eta momentu honetan egiten ari diren yoga ikastaroak. Gainera, aurten lehiaketa ezberdinak egingo dira, esaterako, euskaltegietan egingo den fotonobelena. Beste ekimen batzuk ere sustatu edo bultzatu nahi dira, hain ezagun ditugun ipuin-kontairak, hitzaldiak, bidaien istorioak, eta "Berbalaguna" ekimena, euskaldun zaharrak eta euskaldun berriak harremanetan jartzen dituena.
Gero eta jende gehiagok parte hartzen du Egizun
2003-2004 ikasturteko balorazioa egiterakoan, Egizuko arduradunek oso positiboa dela aipatzen dute. Izan ere, gero eta pertsona gehiagok parte hartzen dute ekimenean. 2002-2003 ikasturtean 500 pertsona parte hartu zuten, eta pasadan kurtsoan 700, beraz kopuruak gora egin du nabarmen.
Harremanetan jartzeko telefono zenbaki hauetara deitu daitezke: 94 491 43 57 edo 605 73 99 16. Helbide elektronikoa: egizu@euskalerria.org
Euskaltegiei diru-laguntzak
Beste alde batetik, udalerriko euskaltegiei eman beharreko diru-laguntzen zenbatekoa erabaki zuen, joan den asteartean, Getxoko Gobernu Batzarrak. Hamasei urtetik gorakoen euskalduntzeari dagokionez, 6.293,25 eta 5.701,8 euro jasoko dituzte Jose Antonio Agirre eta Lauaxeta AEK euskaltegiek, hurrenez hurren. Hamasei urtetik beherakoen euskalduntzeari dagokionez, 1.867,14, 1.529,55 eta 554,4 euroko diru-laguntzak jasoko dituzte Areeta, Algorta eta Getxoko Uztarri euskaltegiek.
Getxoko Udalak 14.414 euro eman ditu Egizu ekimenerako, udalerrian euskara bultzatzeko egiten diren ekintzei laguntza eskaintzen jarraitzeko. Abenduaren 22an sinatu zuten hitzarmena tokiko erakundeak eta ekimenaren bultzatzaileek, hots, Bizarra Lepoan Euskara Elkarteak eta Lauaxeta AEK, Jose Antonio Agirre eta Getxoko Udal Euskaltegiko ordezkariek. Egizuk euskalduntzearen alde egiten du, eta horretarako jada euskaldun direnak euskara ikasten ari diren pertsonekin jartzen ditu harremanetan, hizkuntza erabiltzeko guneak sortuz. Argazkian, ezkerretik eskuinera, Iñaki Ozamiz Jose Antonio Agirre euskaltegiaren izenean, Gorka Uriarte Lauaxeta AEKren izenean, Rocio Luces Egizuko arduraduna, Iñaki Zarraoa alkatea, Josu Esnaola Bizarra Lepoaneko lehendakaria era Imanol Landa Presidentzia zinegotzia.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun