Iñaki Sanchez urrian zehar Mansillako (Leon) kartzelatik atera behar bazen ere, Espainiako Espetxe Zaintzarako Epaitegi Zentralak ez zituen onartu kartzelan egindako lanengatik zegozkion murrizketak espetxealdian. Beranduago, urtarrilaren 1ean jarri zioten ateratzeko data eta herrian dagoeneko autobusa zegoen antolatuta bera egun berrian jaso eta Itzubaltzetara ekartzeko. Atzo asteartean, arratsaldeko 4etan komunikatu zioten Sanchezi espetxetik kanporatzeko agindua, abenduaren 23an sinatuta. Ordu bat t’erdi beranduago kalean zen “Peke”, preso sozial eta politikoen artean bere gauza pertsonalak banatuta, eta oparitutako itsasontzi baten maketa eskuan zuela. Bertako taxista batekin bideraezinak izan ziren negoziazioetan saiatu bazen ere, azkenean Itzubaltzetatik abiatu ziren bere bila, gaueko 10etan jaso zutela. Ordu horiek kartzelako kanpoaldean, elur artean, eman zituen Sanchezek, hain ezagun zituen hormen ondoan.
Euskal Herrirako bidean
Lagunekin besarkadak trukatu ostean txanpan botila ireki zuten Mansillan, kaleraketa ospatu asmoz. Atoan, bueltako bideari ekin zioten, Euskal Herrira ahalik eta lasterren ailegatzeko, tartean izotzak eta elurrak abiadura moteltzea eragin zutela.
“Peke”k harridura azaldu die ingurukoei bapatean antolatutako ongi etorria dela eta, zer edo zer “xumea” eta “lasaia” nahi zuela aurretik esanda baitzuen. Era berean, jendaurrean esandako hitz gutxietan atzean utzitakoak gogoratu ditu, eta bereziki “euskal preso politikoak”.
Balorazio politikoak
Bestalde, Erromoko Askatasunak egin duen lehen balorazioaren arabera, “oso pozik gaude, azkenean ‘Peke’ ekarri dugulako, baina askoz lehenago egon behar zen gure artean” eta “oraindik 709 preso ditugu Espainian eta Frantzian zehar, dispertsatuta”. Era berean, Askatasunak dispertsioak sortzen dituen kotxe istripuekin bukatu behar dela gogoratu du: “aski da, etxean behar ditugu ‘ni hurrengoa izan naiteke’ bezalako leloekin bukatzeko zein prozesu politikoan presoek parte har dezaten”.
Zentzu horretan, Erromo eta Areetako Batasunak ere bere poztasuna agertu du Sanchezen askatasuna dela eta, baina gogoratu du herrian beste bi preso daudela oraindik: Martin Etxegarai eta Iñaki Gonzalo “Kitxu”, eta beraiek Euskal Herrira ekartzeko exijitu dio PSOEko Gobernuari “Euskal Herriko preso, errefuxiatu, deportatu eta errepresaliatu guztiak Euskal Herrian egon behar dira, une honetan indar politiko eta sozial guztiekin bideratu daitekeen prozesu politikoan eragile ezinbestekoak baitira”.
Gaiaren inguruko berriak:
Goizaldeko ordu bata t'erdiak aldera helduko da etxera Iñaki Sanchez Melendo (2004 Abe 28)
Dagoeneko kalean da Iñaki Sanchez Melendo (2004 Abe 28)
Iñaki Sanchez Melendo urtarrilaren 1ean kaleratuko dute (2004 Abe 27)
Iñaki Sanchez Itzubaltzetako presoari bisitak gehiago murriztu dizkiote (2004 Aza 01)
Baliteke azarorako kalean egotea Iñaki Sanchez Erromoko presoa (2004 Urr 28)
Sanchez Melendo dagoeneko etxean dago
2004ko abe. 29a, 05:58
Iñaki Sanchez Melendo “Peke” Itzubaltzeta / Erromoko preso politikoa goizeko 2:30ean heldu da Uribe Kostara, Errontegiko zubia gurutzatuta. Leioako gasolindegian dozena bat auto zain zituela, kotxe karabanan hurbildu dira Itzubaltzetaraino. Herria esnatu ostean, omenaldi azkar bat egin diote Sanchezi Branka herriko tabernaren aurrean. Lore sorta eta opari batzuk eskaini dizkiote 10 urte kartzelan eman dituen Sanchezi eta ondoren, auzotarren besarkada eta muxuei kasu egin eta gero, elkartean sartarazi dute bertan bere argazkia kentzeko eta berari propio kantatutako bertso batzuk entzuteko. Ostean luntxa izan da 70 bat pertsona batu dituen ekitaldian.Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun