Ezer originalagorik otutzen ez zaidanez, urte bukaeraren inguruan idatziko dut, zenbait gezi noraezean botaz, oso originala hauxe ere! Gaur, Gabon zahar gaua izango dugu, parranda egiteko gauarik laburrena, edozein ezagunek grinatsu berba egiten dizun eguna, Drogaren egun internazionala alegia.
Ondo pasatzeko, dantza egiteko eta ihesbide pittin bat ere bilatzeko, danok egiten ditugu gure erosketak, merkatua zabala da, drogaren chance-a ere bai. Bitartean, erretzear dagoen urteak gogorarazten digu: Telebistako debateak, edota estatutu berria, aurrekontuen nahastea, konstituzioari errespetua, ekialde hurbileko landa lehorretan harresi gehiago, harreisak erori nonbait, berriz ere eraikitzeko galtzaileen larreetan, gazte mordoa lau egun, lau gau eta lau ilargitan giltzaperatuak, baina ez da torturarik demokraziaren portzelanazko bular txukunetan, bidaia ezkutuak gauaren baimenarekin, itsasoak ordea ez du barkatzen, gizona bezala gose da, eta paterak jango ditu, gizonaren baimenarekin, hauteskundeak herria hiltzen den auzoetan, nork bozkatuko du orduan? Manchester United 2- Bayer Leverkussen 1 puntu-puntu-puntu-puntu. Baina Gabon zahar gaua ondo pasatzeko da, eta hori guztia gogoan izanda ere, zin egingo diogu gure buruari datorren urtea oparoagoa izango dela, gu kritikoagoak, eta ez diogula gure erosotasunari eta burgesiari garaitzen utziko. Baten bati, Hatori Hanson-ek Uma Thurman-i Kill Bill filman egindako katana gustatuko liztaioko edukitzea, norbaiten handikeria eta harrotasuna mozteko, erretzear dagoen urteak botatako garrasiak mendekatzeko. Neu ere hipokresi horren baitan, kalera aterako naiz. Ah por zierto... urte berri on!
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun