Paco Bartolome taldeko buruak, azpimarratu duenez, “2005ean zehar ziurrenera hiruhileko guztietan ekitaldiak izango diren arren, norgehiagoka hau izango da ekitaldirik garrantzitsuena daukan aurrekontu handiagatik". Hain zuzen ere, 6.000 euroko dirulaguntza eman die Getxoko Udalak. "Horretaz gain, kirol arloari dagokionez, indartsuak dira bi arerioak”, nabarmendu duenez.
Argentina, talderik indartsuenetakoa da mundu mailan, eta Euskadirekin indarrak neurtzea onartu du Europan dagoelako egunotan Tunezen jokatuko den Munduko Txapelketa prestatzen. Bartolomeren hitzetan, “argentinarrek ospakizun honekin bat egitea erabaki dute gurea bezalako talde xume batek 25 urte betetzen dituelako”.
Etxean Euskadi nagusi
Bi taldeek askotan jokatu dute elkarren aurka, baina argentinarrek orain arte ez dute Euskadi etxean irabazterik lortu, Jose Ignacio Altube taldeko hautatzaileak azpimarratu duenez. Euskal Selekzioak Errusiaren aurka joandako abenduaren 27an jokatu zen partidan eman zuen neurria emango duelakoan dago Altube.
Erromo ETk aurtengo aurreikusi duen egitarau bereziak, besteak beste, “Eskubaloi-txiki” izeneko txapelketa, Gabonetako ohikoa eta taldearen 25 urteko historiari buruzko argazki erakusketa hartzen ditu.
Euskadi eta Argentina arteko partida, Erromo Eskubaloi Taldearen 25 urteak ospatzeko
Urtarrilaren 16an, igandean, jokatuko den partida da, dudarik gabe, Erromo Eskubaloi Taldeak bere 25. urteurrena ospatzeko antolatu duen ekitaldi nagusiena. Izan ere, 19:00etatik aurrera, Euskadi eta Argentinako selekzioak arituko dira nor baino nor Fadura kiroldegian. Guztira, norgehiagokara joan ahal izateko 600 gonbidapen banatuko ditu Itzubaltzeta / Erromoko klubak, EAEko hiru lurraldeetako federakuntzetako, Bizkaiko 30 bat taldeetako eta etxeko taldeko zaletu eta jarraitzaileen artean; Nazioarteko Federazioak holakoetarako ezarritako neurriak betetzea aldera. Argazkian, Euskal Selekzioak Errusiaren aurka jokatutako partida.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun