Gaizkileek software espioia (troyatarra) erabili izana aipatu zuen atzoko edizioan El Correo Españolek. CyberEuskadik egiaztatu ahal izan duenez, ordea, troyatarra ez da nahikoa horrelakorik egiteko eta "baliteke gaizkileek aurrezki kutxak bezeroari ematen dion kodeen zerrenda lapurtu izana" iruzurra egin ahal izateko.
Agiri hori "behar-beharrezkoa" da Internet bidez BBKn eragiketak egin ahal izateko. "Kode horiek halabeharrez jarri behar dira, eragiketa batetik bestera mode ezberdinean konbinatuz", diote webgunean. Hortaz, troyatarra ez litzateke nahikoa izango. "Horren bidez kontuaren klabeak ezagutu arren, zenbat diru dagoen eta horrelako datuak ezagutzeko aukera baino ez luke edukiko iruzurraren egileak", azaldu dute CyberEuskadin.
Diru gehiago lapurtu nahi zuten
Abenduaren 4an eta 6an mugimendu arraroak antzeman zituen BBKren banka elektronikoko zerbitzuak eta ezeztatu egin zituen sei operazio. Operazio horietan beste 30.069 euro atera nahi zituzten kontu korrontetik, baina ezin izan zuten lortu BBKren segurtasun iragazkiek gehiago lapurtzea eragotzi zutelako.
Segurtasun informatikoaz arduratzen diren adituak jo eta ke ari dira lanean horrelakorik gehiago gerta ez dadin. Izan ere, egun, ia 2,5 milioi erabiltzaile ditu on line bankak Espainiako Estatuan.
Ertzaintza Getxoko eskola batek jasandako iruzurra ikertzen ari da une honetan. Izan ere, abendu hasieran 21.518 euro lapurtu zizkioten BBKn duen kontutik eta Ukrainako talde organizatu bat egon daiteke iruzurraren atzean. Momentuz, Sevillan kontu korronte bat zuten bi ukrainar eta Huelvan beste bat zuen nigeriar bat atxilotu dituzte. Hainbat adituren hitzetan, kontu korrontearen jabearen deskuidoagatik baino ezin izan da gertatu horrelakorik.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun