Igaz egindako galdeketan, beren herriarekiko poztasun-maila ona erakutsi zuten erandioztarrek. Batetik bosteko eskalan 3,59 puntuko nota jarri zioten. Horrekin batera, daukan bizitza-kalitatearekin kontent agertu zen herritarren %49,6. Orokorrean, hobeto bizi zirela adierazi zuten galdetutako gehienek (bosteko eskalan 3,60 puntu) eta bizitza-kaletatearen hobekuntzari dagokionez baikor azaldu ziren (%3,67). Erakunde bezala 3,50eko puntuazioa jaso zuen aipatu galdeketan Erandioko Udalak.
Hainbat gauza hobetu daitezke
Galdeketan aipatzen zirenen artean, zarama-bilketa, hezkuntza eskaintza, herri-segurtasuna, gizarte zerbitzuak eta elkarulertze politikoa izan ziren herritarrek hobekien baloratu zituzten gaiak, udal arduradunen arabera. Haatik, hainbat gai hobetzea eta beste arazo batzuei irtenbidea ematea eskatzen dute erandioztarrek, hala nola, trafiko arazoak edota euskararen presentzia areagotzea. Horretaz gain, etxebizitza, jolasgune eta kultur ekintza gehiago eskatzen dute.
Merkatuen ikerketetan entzutetsua den euskal enpresa bati esleituko dio laster Erandioko Udalak, herritarren poztasun-maila neurtzeko beste galdeketa bat egitea. Horren bidez, erandioztarrek hainbat arlotan duten iritzia ezagutu nahi du tokiko erakundeak: zer pentsatzen duten Erandioko bizitza-kalitateari buruz, udalak eskainitzen dituen zerbitzuak egokiak diren ala ez, bertan hartutako erabakien inguruan zer uste duten... Aldi berean, herritarrek zenbait gairen inguruan duten "interes-maila" ere neurtu nahi dute, udal arduradunen hitzetan. Astrabudua eta Altzagako kiroldegietako erabiltzaileei begira ere galdeketak prestatzen ari dira.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun