Hiru lagunen arteko maitasun istorioa kontatzen duen "Wild side" filmak jaso du Zinegoak-en sari nagusia, film luze onena izanik. Sebastien Lifshitz-ek zuzendutako lanak iaz Berlinalen izandako harrera ona –Teddy saria irabazi zuen– berretsi du Bilboko jaialdiko epaimahaiak. Lesbianismoa genero ikuspegitik ondoen aztertzen duen filmari emandako saria, berriz, Tina Cesa Ward estatubatuarraren "In their absence" lanarentzat izan da.
'El Che de los gays'
Arturo Alvarez Roa txiletarraren "El Che de los gays" lanak Victor Hugoren bizitza du ardatz. Oso gaztetatik Askapen Homosexualeko Mugimenduan militatzen hasi zen Victor Hugo, eta Txileko gay, lesbiana eta transexualen bazterketaren aurkako borrokaren eragile nagusietako bat bihurtu zen. Jendearen arreta bereganatzeko modu bereziak, ordea, laudorioak eta kritikak ekarri zizkion. "El Che de los gays" dokumentala Txileko Viña del Mar hiriko jaialdian estreinatu zen duela hilabete batzuk, eta Bilbokoa izan da lehen aurkezpena Europan.
'A different war'
Nadav Gal israeldarraren "A different war" filmari dagokionez: Eskolan David erregearen rola jokatzeko hautatua izan da Nuni haurra, baina berak nahiago zuen printzesaren rola jokatu. Samurtasun handiko istorioak Palestinaren eta Israelen arteko gatazka du atzean. Film hau Madrilgo eta New Yorkeko gay eta lesbianen zinema jaialdietan aurkeztu zen iaz.
Gaiaren inguruko berriak:
Zinegoak badator Uribe Kostara (2005 Urt 24)
Zinegoak 2005eko lau filme eskainiko dituzte Getxo Antzokian (2005 Urt 12)
Getxo, Leioa, Berango eta campusa ere hartuko ditu Zinegoak 2005 jaialdiak (2005 Urt 11)
Atzo iragarri bezala, gaur abiatuko da, Uribe Kostan, urtarrilaren 19tik 23ra bitartean Bilboko Zinegoak jaialdian aurkeztutako filmeen proiekzioa. Hain zuzen ere, igandean saritutako lau lanetatik bi eskainiko dituzte eskualdeko aretoetan. Dokumental onenaren saria jaso duen "El Che de los gays" filma (argazkian) gaur egongo da ikusgai 20:00etan Kultur Leioan. Film labur onenaren saria jaso duen "A different war", berriz, Algortako Getxo Antzokian eta Berangoko Kultur Etxean egongo da ikusgai, bihar (20:00etan) eta etzi (19:00etan), hurrenez hurren.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun