Albistegi bereziaz mozorrotuta, eta Maddalen Iriartek gidatuta, lau ordu t'erdiko programa euskañolak bahituko du euskaldunok daukagun telebista kate bakarra. Ordu horietan ez da egongo Ordiziako dantza txapelketarik, Nafarroako jota lehiaketarik (gehiena erdaraz ere bai), futbol partidarik edota Mister Beanen enegarren errepikapena. Gora gu!
Esaiozu Ortuzarri
1982an EHEtik "Gabon hauetan irratia eta telebista euskaraz" kanpaina abiatu genuenean ez zen telebista hau bultzatu nahi genuena. 1982an lorpena izan zena, ETBren sorrera, denbora pasatu ahala okerrera joan da. ETB2ren sorrerarekin ETBko estatutuetan jasotako helburua (euskara bultzatzea) amildegira bota zuten. Gainera, egunero "Galdácano", "San Sebastián", "Pamplona", "Lejona", "Santurce" eta antzekoak entzun behar ditugu, toponimian euskaltzaleek egindako urteetako lanari bost eginez.
Gu bezala ETBrena nahikoa dela uste baduzu, Andoni Ortuzarri esan: ortuzar@eitb.com
Andoni Ortuzar EITBko zuzendaria euskaldunon kontra aritzen tematuta dagoela ematen du. EAJ, EA, EB eta Batasunak aukeratutako gizonaren menpe dagoen ETB gaur, hirugarren aldiz hilabete eskas batean, euskaldunoz trufatuko da. Gabonetan, Harry Potterren filmearen estrenaldia; abenduaren 30ean, Ibarretxe Plana Gasteizko legebiltzar diglosikoan; eta gaur euskara erabiltzeagatik munduan famatua den Madrilgo Kongresuko batzarra ETB1ean jarraitzeko aukera daukagu.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun