Guztira, ordu bat eta laurdeneko emanaldia izango da. Iñaki Beraetxek eta Iñigo Kintanak zuzendutako "Ostertz" (15´), Safy Nebbouren "Lepokoa" (23´), Angel Aldarondoren "Amnesiak" (6´), Ane Muñoz Mitxelenaren "El salto de Beamon" (15´) eta Koldo Almandozen "Amuak" (9´) dira proiektatuko diren iraupen laburreko filmak.
Filmak proiektatu eta gero, emanaldi gehienetan zuzendari bat egongo da, ikuslee galderak eta euren iritziak konpartitzeko. Horrela, zinegile eta ikusleek elkar ezagutzeko aukera izango dute. Aldi berean, euskara elkarteek herrietako eskaintza kulturala aberastuz, hizkuntzaren erabileran eragingo dute.
Oso harrera ona
Ane Muñoz Mitxelena zine zuzendariak euskal lanak zabaltzeko bide egokia deritzo film laburren zirkuituari. "Jaialdietatik kanpo, inolako lehiakortasunik gabe, gure filmak konpartitu eta ezagutzera ematen ditugu". Alde horretatik, iazko esperientzia "guztiz positiboa" izan zela azaldu du. Iazkoan ere, Ane Muñozen "Basurdea" lana zabaldu zen, besteak beste, eta zinegileak zabalkundea bera goraipatu du. Bere ustez, "ikusle berriak bilatu eta mota zein adin guztietako publikora heltzeko bidea" da zirkuitua.
Film laburren zirkuituak 23 emanaldi izan zituen iaz eta guztira, 1.200 ikusle erakarri zituen. Aurtengoak 24 proiekzio egingo ditu eta iazko ikusle kopuru horri eustea da helburua.
Topagunea, Euskara Elkarteen Federazioaren kultura sailak euskal film laburren zirkuituaren 2.edizioa aurkeztu du. Guztira, metrai laburreko bost film emango dira, Hego Euskal Herriko 22 herritan, otsailaren 17tik martxoaren 23ra bitartean. Uribe Kostari dagokionez, Astrabuduako Josu Murueta Kulturgunean izango da emanaldia, otsailaren 24an, Erandion Euskaraz Berbots elkartearen eskutik. Arratsaldeko zortzietan da saioa, sarrera dohainik.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun