Leioa Mendi Taldeak antolatuta, Arabako Toloño mendirako igoera izango da datorren igandean, otsailak 27, Bastidako ibilbidetik. Txangoa goizean egingo da, geroago Mendi Taldeak bazkaria antolatu baitu Lantziegon. Toloño mendi ederra da (1.263 m.), euskal mendizale orok ezagutu beharreko horietakoa. Gainaldean tontor ugari ditu eta ez da erraza altuena zein den asmatzea. Interesatuta dagoena osteguneko 21:00ak arte eman dezake izena elkarteak Sakoneta polikiroldegian duen egoitzan edo 689 721 917 telefonoan.
Gaztelu haitza deritzote mendebaldeko muturrean dagoen tontorrari, baina ez da ziurra izen hori oso zuzena izatea, izan ere erdialderago, santutegiaren ondoan dagoen haitz ikusgarri hori da gazteluaren hondakinak gainean dituena. Ez da igotzen erraza erdialdeko haitz hau, tximinia pare bat dira horretarako aukera ematen dutenak. Tontorra ekialderago dago, hiru buzoirekin seinalatuta, baina erpin geodesikoa oraindik ekialderago dagoen beste muino batean dago. Edozein modutan ere, gainaldea hara eta hona ibiltzeko paraje ederra da. Erdi Aroko Santutegi baten hondakinak ikus daitezke bertan eta baita elurzuloa ere, bere aldamenean. Eguraldi garbiarekin Errioxa osoa ikus daiteke hegoaldean.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun