Zegokion batzordean baztertua izan arren, emakumeen aldeko mozioa osoko bilkurara eramango du PPk

Martxoaren 8an ospatuko den Emakumeen Nazioarteko Egunaren harira, Gizarte Gaietarako Batzordeak Getxoko PPk aurkeztutako mozioa baztertu izana kritikatu du gaur Marisa Arrue talde horretako bozeramaileak. "Saldu nahi digun jarrera sozial eta aldarrikatzailea ez da egiazkoa. Itxurak baino ez dira, garaia heltzen denean ekintzek ez baitoaz bide horretan", egotzi dio aipatu batzordea zuzentzen duen Iñaki Urkiza EB-Berdeakeko zinegotziari Arruek. Hala ere, udalbatzak gaia eztabaidatzeko aukera egongo da, PPk mozioa biharko osoko bilkuran aurkeztea erabaki duelako: "Bere garaian guztion artean zeozer adostuko genuela agindu zigun Urkizak, baina ez du ezertxo ere egin. Iritzia aldatu eta gure mozioa ones dezala espero dugu", dio popularren ordezkariak. Bertan, emakumearen "benetako" berdintasunaren aldeko adierazpen instituzionala egitea eskatzen zaio Getxoko Udalari.