Erandioko 21 zinegotzietatik 12k sinatutako agirian, hauek Algecirasko Botafuegoko espetxe zuzendaritza, Arartekoa, Eusko Legebiltzarreko Giza Eskubideetarako Batzordea, Espetxe zaintzarako Epaitegi Nagusia eta Espainiako Espetxe Erakundearengana jotzea agindu dute, Bilbaoren egoera konpontzeko. Era berean, egiten diren gestioak Bilbaori jakinaraziko dizkiote eta bere senide, lagun eta bere alde lan egiten dutenei elkartasuna adierazi diete.
Gainera, Jon Bilbaoz aparte, Aiboa Casares, Mila Etxebarria eta Lurdes Cerratori buruzko "gure interesa handituko dugu, Erandioko hiritarrak diren neurrian" adierazi dute EA eta EAJkoek sinatutako testuan. Azken puntuan, "pertsona bakoitzaren eta pertsona guztien giza eskubideen aldeko defentsan aritzea berrestu" eta "bakearekiko erabateko konpromezua" aipatu dute alkate eta zinegotziek.
Unibertsitateetako Presoen Aldeko Taldeek (PAT) eta Oihua Uribe Kostako Amnistiaren Aldeko Mugimenduaren agerkari elektronikoak urtarrilean zabaldu zuten Jon Bilbao Morori buruzko erdarazko txosten zehatza. Eragile horiek egindako lana hemen aurki daiteke.
Mikel Arieta-Araunabeña Erandioko alkatea eta EAJ eta EA alderdien zinegotziek herri horretako auzokidea den Jon Bilbao Moro preso astrabuduarraren etxeratzea eskatu zuten atzo publikoa egin zuten agiri baten bitartez. Agiri horretan, Erandioko Udal Gobernua osatzen duten taldeek bere "kezka" erakutsi zuten Bilbaoren bizi-baldintzen inguruan, izan ere, 1982an Guardia Zibilak atxilotu zuenetik lehengo graduan eman ditu Jon Bilbaok kartzelako urte guztiak eta haietako asko isolamenduan pasatu ditu. Egoera horrek, EAJ eta EAk gogoratzen dutenez, "inolako espetxe abantailarik ez izatea eragotzi dio" eta horregatik Estatuko Administrazioak Bilbao "aparteko ankerkeriaz, isolamendu zigorraz, eta politikoki erabiliz" tratatzen duela salatu dute. Bilbaok 2002an bete zituen zigorraren hiru laurdenak eta tratamendu "normala" jaso izanez gero kalean izango litzateke data horretatik aurrera. Horren ordez, Algecirasko Botafuego espetxean jarraitzen du.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun