Horretaz gain, udal arduradunek eta herriko gizarte eragileek osatuko duten batzordea sortzera behartzen du Aukera Berdintasun Planak. Horren jarraipena eta helburuak betetzen diren aztertuko du aipatu erakundeak.
Neurri zehatzak
Udal-langileen artean bultzatuko dute gehien bat aukera berdintasuna. Hezkuntza zentroetan, berriz, kirol jardueren eskaintza zabalagoa egin nahi dute, sexuen arteko bereizketarik egin gabe. Hirigintzari dagokionez, emakumeen parte-hartzea bultzatuko da, euren interesak eta beharrak kontutan har daitezen. Horretaz gain, bakarrik bizi diren edo senideren bat euren ardurapean daukaten emakumeei arreta berezia eskainiko zaie, ezegonkortasun ekonomikoa saihestu eta horien laneratzea edota gizarteratzea errazteko asmoz.
Hezkuntza Arloaren bitartez, ikastetxeek ere egitasmoan buru belarri aritzea bultzatuko da, eskola barruko zein kanpoko jardueren bitartez, ikasleek euren aukerak zeintzuk diren ezagutu ditzaten sexuaren araberako estereotipoei muzin eginez. Kulturan, berriz, "emakumeek edota emakumeei buruzko ekoizpenei bidea" ematea izango da lehentasunetako bat. Azkenik, tratu txarrak edota sexu-erasoak jasaten dituzten emakumeak hartzeko zentroak sortzeaz eta horiek kudeatzeaz arduratuko da Gizarte Ekintza Arloa. Hitzarmena ere sinatuko dute Andrak herriko elkartearekin.
Aukera Berdintasun Plana aho batez onartu zuten, joan den asteazkenean egindako osoko bilkuran, Leioako Udalean ordezkaritza daukaten alderdi guztiek (EAJ, EA, PSE-EE, PP eta EB-Berdeak). "Elkarte eta kolektibo anitzen parte-hartzeari esker, kirola, kultura, osasungintza eta hezkuntza arloak jorratzen diren 97 ekintza aurrera ateratzea da helburua", Bea Buesa aipatu ekimenaren ardura daukan zinegotziaren hitzetan. Edukiak zabaltzea ezezik, trebakuntza ere hartuko du beregain. Adibidez, tratu txar edota sexu-eraso salaketei modu egokian arreta eman ahal izateko, psikologia, zuzenbide eta osasun-gaiei buruzko informazio gaurkotua izango dute udaltzainek. Udal barruko lan-esparruari dagokionez, berdintasunaren gaineko etengabeko prestakuntza sustatuko da. Bestalde, sexu aldagaia sartuko dute udal azterketa, txosten, memoria eta agirietan.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun