Lucia Linares Garcia Uribe Kostako Emakume Alargunen Elkartearen (ALBOA) presidentea eta Euskal Herriko alargunen federazioaren sortzaileak eskainitako hitzaldiarekin abiatu ziren atzo arratsaldean Berangoko Emakumeen Jardunaldiak. Horientzat interesekoak diren gaiei buruz aritu zen aipatu ekitaldian eta, horretaz gain, ohorezko saria emango zitzaion ALBOA elkarteari emakumeen alde egiten duen lanagatik.
Kalejira, antzerkia...
Hala ere, asko geratzen da oraindik martxoaren 8an ospatuko den Emakumeen Nazioarteko Egunaren harira antolatutako ekitaldieei bukaera emateko. Asteburu honetako autodefentsa ikastaroaz gain, aurretik adierazitako egunaz ondo baino hobeto gozatzeko, umorez beteriko kalejira egingo dute, 19:15etik aurrera, Sabino Aranatik Kultur Etxera. Ondoren, txokolatea egongo da guztientzako.
Antzerkiak ere ezin zuen kale egin jardunaldietan eta, hilaren 11an, Que se mueran los feos antzezlana eskainiko du, 19:00etatik aurrera, kultur etxean, Bonbolinak taldeak. Aipatzekoa ere, Maria Jose Urruzola pedagogoa eta LANBROA kolektiboko kideak Prevención de la violencia de género desde la coeducación izenburupean emango duen hitzaldia, beste hainbat ekitaldien artean. Kultur etxean ere izango da saio hori, 19:30etik aurrera.