Ondategin segurtasun neurriak areagotzea eskatuz, ostiralean, Getxoko PPk aurkeztutako mozioa udal gobernua osatzen duten EAJ, EA eta EB-Berdeakeko kontrako botoekin gelditu zen bertan behera. Imanol Landa Presidentzia zinegotziak udalbatzari adierazitakoaren arabera, "osoko bilkura ez da lekua horrelako eskaera egiteko, gehienbat segurtasun kontuak direnean, eztabaida publikorik ezin daitekeelako egin". "Bizilagunen onerako ez da", gaineratu zuen Landak. Are gehiago, neurri horiek areagotu diren ala ez ia badakien galdetu zion Marisa Arrue popularren bozeramaileari.
Horrek, ordea, "hitz politak" ez direla nahikoak eta "horren sentsibilizaturik" badaude, mozioaren alde egiteko exijitu zien udal gobernua osatzen duten alderdietako zinegotziei. "Badakit atzera botako duzuela, batik-bat guk aurkezten dugulako", egotzi zien Arruek, jokabide hori "lotsagarria" zela gaineratuz. "Presoen senideei aisa ematen dizkiezue dirulaguntzak, baina bonbek kaltetutakoei..." ere bota zuen zinegotzi popularrak.
Morak huts egin zuen
Orduan iritzi ziren eztabaidaren unerik beroenak. "Zuek gu ETArekin lotzeaz kokoteraino gaude. Dagoeneko gizarteak ez ditu gure aurka egiten dituzuen salaketak sinisten, nazionalismoa eta terrorismoa gauza bera direla esanez", erantzun zion ozen Arrueri Landak. PSE-EEko eta PPko aldeko botoak baino ez zituen jaso mozioak, hutsune nabarmenak tartean. Larunbateko elkarretaratzea iragarri duen Gotzone Mora ez zen osoko bilkuran egon, Terrorismoaren Biktimen Elkarteak (AVT) antolatutako jardunaldietan zegoelako Kolonbian, Jose Maria Aznar Espainiako presidente izandakoarekin batera.
Segurtasun handiagoa eskatzeko elkartuko dira udaletxe aurrean Ondategiko bizilagunak
Gotzone Mora Getxoko PSE-EEko zinegotziak jakinarazitakoaren arabera, udaletxe aurrean egingo dute kontzentrazioa, larunbat honetako ordu batetan, Areetako Ondategi kalean ETAk lehertarazitako bonba-autoak kaltetutako auzokideak. Ermuko Foroko kide eta Leioako EHUko irakaslea ere denak adierazitakoaren arabera, "bizilagunena beraiena izan da ekimena, inguru horretan izandako atentatuengatik euren buruak babesgabe ikusi eta alkateari segurtasun neurriak areagotzea exijitu nahi diotelako". Horren harira PPk ostiraleko osoko bilkuran aurkeztutako mozioa "Iñaki Zarraoak atzera bota izana lotsagarri" iritzi dio Morak, "batik-bat larunbatean 18/98 makrosumarioaren aurkako manifestazioaren buruan egon zelako Jone Goirizelaiaren alboan". Udalbatza bildu bitartean Kolonbian zegoen Mora AVTk antolatutako jardunaldietan.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun