Dagoeneko azken urteotan udalerrian egin diren ekitaldiak aurrerantzean ere egiten jarraitzeko, Bizkaiko Herri Kirol Federazioarekin lankidetza hitzarmena sinatuko du Getxoko Udalak. Hiru urteko iraupena izango du eta, horri esker, aurten Euskal Kirolaren Eguna, Bizkaiko Zaldi Proben Txapelketa, idi-proben bi jaialdi –pisu librean zein konparatuan– eta udalerriko jaietan erakustaldi bana egiteko konpromisoa hartuko du kirol erakundeak (azkenekoak izan ezik guztiak Getxoko probalekuan). Hain zuzen ere, aipatutako lehenengoan kirolari ezagunak ez ezik, Asturias, Galizia eta bestelako herrialdetatik etorritakoak ere aritzen dira lehian. Getxoko Udalak, berriz, federazioari 40.000 euro emango dizkio 2005eko ekitaldiak aurrera ateratzeko. Izan ere, diru-laguntzena "urteko aurrekontuen araberakoa" denez, bere garaian zehaztuko dira 2006 eta 2007rako diru kopuruak.
“Getxoko Udala eta federazioaren arteko harremana aspaldikoa da. Herri kirol ekitaldi gehien egiten dituen udalerrien artean dago Getxo eta, orain arte, dirulaguntzen bitartez egin bada ere, hitzarmena sinatzea erabaki dugu hurrengo urteotan mota honetako ekitaldiak egingo direla ziurtatuz”, azaldu du Iñaki Zarraoak. Alkateak zehaztutakoaren arabera, udal erakundeak dirulaguntzak emateko arautegiak izatera behartzen du, gaur egun, Espainiako Gobernuko lege batek. Horren harira, aipatutako federazioarekin harremana sendotzeko hitzarmena sinatzea erabaki dute.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun