Antzerkia berriro ere gizartearentzat eta bertako biztanleentzat beharrezko izan dadila lortzea, hauxe da Ekoma Teatro antzerki taldearen asmo nagusia. Orain dela gutxi sortutako talde honek "euskarazko antzerkia erderazkoa bezain duina, sendoa eta lehiatsua egiten" saiatuko da. Era berean, ikusentzuleekin harreman estuagoa izan nahi du bere arimara heltzeko eta, horretarako, bide berriak deskubritzeko asmoa dute.
"Palaskarra eta bide bat"
Fitxa teknikoa eta artistikoa:
- Zuzendaritza eta antzerkigintza: Arantxa Iurre
- Ekoizpena: Ékoma Teatro
- Aktoreak: Aitor P. Collado, Javier Liñera, Débora Nogales, Iraide Urkiaga, Aitor Villar
Zuzendariaren oharra:
"Egun batean oinazea heldu zen nire bizitzara, jakinarazi gabe eta jausgailurik gabe. Ihesari eman nahi izan nion eta zein bide hartu ez nuen jakin izan. Palaskarra denbora luzez buruan erabili nituen bi hitz horietaz ikasi nuena kontatzen duten tokia da: Bidea eta Oinazea. Oinazea era askotan bizi daitekeela, garen gizakiak ia bezainbeste bizipen dituela ere ikasi nuen. Horrek lasaitu ninduen. Zergatik? Hain bakarrik ez nengoela sentitu nuen."
Ekoma Teatro udalerriko antzerki talde sortu berriak "Palaskarra eta bide bat" bere lehenengo lana estreinatuko du Algortako Getxo Antzokian martxoaren 11n eta 12an. Ostiralean euskarazko bertsioa antzeztuko dute eta biharamunean erderazkoa. "Bizitzan zehar bideak hautatu beharra" da Ekomaren lanaren gai nagusia. "Palaskarra eta bide bat" trenez egindako bidaia baten istorioa da. Bidaiariek ez dakite non dago Palaskarra eta, egia esan, ez da benetako helmuga, baina behin trena hartuta ez dago gelditzeko aukerarik. Bidaian zehar bizi izandakoa aztertuko du pertsonai bakoitzak istorio tragikomiko honetan. Bi saioak 20.00etan hasiko dira eta sarrerak, otsailaren 28tik daude salgai, 8.5 eurotan (6.5 euro jubilatuentzat edo Gazte Txartela aurkeztuz).
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun