Zerbitzuen sektorearekin lotutako jarduerak daude lehen postuan. Izan ere, enpresa sortu berrien ehuneko 69 izan dira, kapital sozialaren ehuneko 72 ordezkatzen dute eta 9 enpresa gehiago sortu dira.
Urteko lehenengo bi hilabeteetan sortutako 329 zerbitzu-sozietate berrietatik, 130 ondasun higiezinen gaineko jarduerei eta enpresentzako zerbitzuei dagozkie, 94 merkataritza-sektorekoak (handizkakoak zein txikizkakoak) eta ibilgailuak konpontzeko sektorekoak dira, 46 zerbitzu publiko edo pertsonalekoak, 26 finantza-artekaritzan dabiltza, 20 ostalaritzakoak dira, eta beste 13, berriz, garraio eta komunikazioetakoak.
Eraikuntza eta industria
Eraikuntzaren sektorean 96 sozietate berri sortu dira urteko lehen bi hileetan, hau da, 2004ko urtarrila-otsailean baino 23 gehiago. Dena den, Bizkaian sortutako konpainia guztien ehuneko 20 dira, eta kapital sozialaren ehuneko 27 ordezkatzen dute. Enpresa bakoitzeko batez besteko kapitala 149.629 eurokoa izan da.
2005eko lehenengo bi hilabetetan sortutako sozietateen ehuneko 9,5 industriaren sektorekoak dira, hots, kapital sozialaren ehuneko 1,1 ordezkatzen dute. Sektorearen batez besteko kapitala 13.334 eurokoa izan da enpresa bakoitzeko. Izan ere, 42 manufaktura-enpresa sortu dira, eta horietatik 11, metalen transformaziorako industriari dagozkio.
Urtarrila eta otsailean 474 enpresa berri sortu ziren Bizkaian, eta kapitalaren guztizko ekarpena 53 milioi eurokoa izan zen, hau da, enpresa bakoitzeko kapitala 112.921 eurora iritsi zen, batez beste. Horrek esan nahi du 31 sozietate berri gehiago dagoela 2004ko aldi berberarekin konparatuz (443 enpresa), Bilboko Merkataritza Ganberako iturriek astearte honetan jakinarazi dutenez. Bizkaiko enpresaburu ekintzaileen kokapen gogokoena, alde handiz, Bilbo izan arren –225 baitira hiriburu horretan egoitza soziala duten enpresa berriak–, Getxo da 2005eko lehenengo bi hilabetetan enpresa gehien hartu dituen lurraldeko udalerria (37 enpresa). Leioa eta Erandio ere lehenengo postuetan daude, 14 eta 9 enpresarekin, hurrenez hurren. Eskualdeei dagokionez, Uribe Kostak ere bigarren postua dauka "rankingean" (103 enpresa), Bilboren atzetik.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun