Euskara oso ondo dago gauza batzuetarako, baina gainerakoan hobe dago txoko batean. Zer leku dauka gure hizkuntza zaharrak erakusketa-areto erraldoien, honezkero elkarrekin korapilatzen hasiak diren errepide-sare modernoen, museo superfashion-en eta altzari denda ahalguztidunen Euzkadi global honetan? Guk progresoa behar dugu, ekonomia -batez ere batzuena- haztea, eta halakoak. Unibertsalak izan behar dugu, eta euskarak ez du lekurik unibertsoan.
EAEko irakasle batzuek itxialdia hasi dute euren lanpostua galtzeko zorian egon litezkeelako –nik, ikusi are, ez dut sinestuko-, euskara ez jakitearren. Zenbait komunikabide arineketan joan dira haiengana, bozgorailua eskaintzera. Euren eskubideak ez zanpatzeko, mesedez, hamaika itxialdi egin dituzten euskaldunentzako isilik egoten diren bozgorailu berberak. Bitartean, umeek erdara hutsez ikasteko eskubidea daukatela aldarrikatzen dute alderdi politiko batzuek, Espainian gaude eta. Ez itzazu nahastu euskara eta politika, espainiarrek ederto egingo dute-eta zure ordez.
Euskararen alde gauza handirik egiten ez duten zenbaitek diotenez, euskararen alde ekiteko modurik hoberena hizkuntza eta politika elkarrekin ez nahastea da. Euskaldunok nahastu ditugu ala? Euskararen gaur egungo egoera geuk hartu ez ditugun erabaki politiko zehatzen ondorioa da, eta konponbidea ere bide beretik etorriko beharko da halabeharrez. Horregatik esaten dute batzuek ez direla euskara eta politika elkartu behar. Badaezpada ere. Ez daitezela gauzak konpondu, mesedez!
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun