Auzitegi Nagusiaren Administrazioarekiko Auzi-aretoak bertan behera utzi zuen atzo Justizia Sailaren agindua Estatuko espetxe politikako konpetentziak urratzen zituelakoan. Auzia 2003ko urriaren 31an abiatu zen, Estatuko abokatuak 2003ko uztaileko 30eko agindua errekurritu zuenean. EAEko Auzitegi Nagusiak hainbat argudio jaso ditu atzo kaleratutako txostenean (irakurri hemen, Izaronews-i esker). Haien artean, honakoak dira garrantzitsuenak:
- Espetxeen gaineko konpetentziak Gernikako estatutuaren arabera EAEko administrazioari dagozkio, baina transferentzia oraindik ez da egin eta, hortaz, auzitegiaren arabera konpetentziaren kudeaketa, oraingoz, Estatuari dagokio eta ez Lakuari.
- Era berean, Aretoaren ustean, laguntzak aplikagarriak izatekotan EAE mailan izango lirateke eta hortaz onuradun guztiek ez lukete diru-laguntzarik jasotzerik, agindua hain zuzen ere, EAEtik kanpo dauden presoak bisitatzeko baita.
Uribe Kostako 37 presoren senideei kalte diezaieke EAEko Auzitegi Nagusiak laguntzak kendu izanak
Eusko Jaurlaritzako Justizia Sailak sakabanatutako presoen senideei dirulaguntzak emateko indarrean zeukan agindua bertan behera utzi zuen atzo Euskal Autonomia Erkidegoko Auzitegi Nagusiak. Eskualdean 40 dira Euskal Preso Politikoen Kolektiboaren barruan kokatzen diren presoak, eta, haietatik 37 sakabanatuta daude Euskal Herritik kanpo. Haien familiak atzora arte bisitan joateko Eusko Jaurlaritzari dirulaguntzak eskatzeko aukera zuten. Gaur ez eta bihar batek daki Lakuak errekurtsoa aurkeztuko duela iragarri baitu. Dena den, EAEko Auzitegi Nagusiaren erabakiak ez du eraginik izango bestelako dirulaguntzetan, udalenetan, alegia.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun